Komuna e Prishtinës nuk mund ta injorojë festën e Pavarësisë
16/02/2015Ferizaj 16 Shkurt 2015-INPO me shqetësim reagon ndaj vendimit të komunës së Prishtinës për të mos festuar ditën e Pavarësisë së Republikës së Kosovës. Arsyetimet e shumta se Komuna nuk ka mjete të mjaftueshme financiare për ta shënuar këtë ditë janë të papranueshme. Komuna ka pasuar mundësi që të përgatitet në kohën e duhur, sikur të gjitha komunat e tjera të Kosovës, që me dinjitet të shënoj 17 Shkurtin, si ditën më të rëndësishme shtetërore të paraparë me ligjin për festat zyrtare të Republikës së Kosovës.
INPO i bënë me dije komunës së Prishtinës se Festa e Pavarsisë, është festa më e rëndësishme e shtetësisë së Republikës së Kosovës, dhe Prishtinës si kryeqendra e saj, i takon që të organizoj qoftë edhe aktivitete simbolike të cilat përcjellin mesazhin festiv tek qytetarët dhe shënojnë ditën më të rëndësishme, atë të krijimit të shtetit të pavarur dhe sovran të Kosovës. Mos shënimi i ditës së Pavarësisë, përbën cenim të identitetit të Republikës. Në bazë të nenit 2, të Ligjit për Festat Zyrtare, Dita e Pavarësisë ashtu si dhe festat e tjera, përkon me historinë, kulturën dhe traditat e popullit të Kosovës, dhe si e tillë duhet festuar.
INPO vlerëson se komuna e Prishtinës ka pasur disa mundësi që të organizojë shumë aktivitete të cilat nuk kërkojnë asnjë shpenzim financiar, si: organizimi i shfaqjeve teatrore, mbrëmje letrare apo edhe performanca artistike nga grupet kulturore të cilat veprojnë në Prishtinë dhe marrin mbështetje të vazhdueshme financiare në formë të subvencioneve nga Komuna e Prishtinës. Të paktën, në hyrje të Prishtinës, Komuna ka mund të vendos flamurin e Republikës, veprim ky i cili nuk kërkon shpenzime financiare, por vetëm do të tregonte përkushtimin e komunës, që edhe në mënyrë simbolike të festonte ditën e Pavarësisë.
Përfundimisht, gjendja e vështirë politike, ekonomike dhe sociale nuk mund të përdoret kurrsesi si arsyetim për të mos festuar dhe injoruar në tërësi Ditën e Pavarësisë.