Takimi informues me Bashkësitë Lokale të Komunës së Prishtinës

27/03/2015

Prishtinë, 27 Mars 2015- INPO në kuadër të projektit “Ngritja e pjesëmarrjes së qytetarëve në hartimin e buxhetit komunal”, i cili mbështetet nga Fondacioni për Shoqëri të Hapur KFOS, mbajti një takim njoftues me përfaqësuesit e bashkësive lokale të Komunës së Prishtinës.

Qëllimi i këtij takimi ishte njoftimi i përfaqësuesve të bashkësive lokale lidhur më rëndësinë e pjesëmarrjes së qytetarëve në hartimin e buxhetit komunal, si dhe aktivizimi i tyre për të qenë faktor vendimmarrës në të gjitha proceset që kanë të bëjnë me vetëqeverisjen lokale.
Pjesëmarrës në këtë takim ishin përfaqësuesit e bashkësive lokale, Drejtori i Drejtorisë së Administratës në Komunën e Prishtinës z. Muhedin Nushi, si dhe përfaqësuesit e organizatës INPO.

Debatin e hapi drejtori ekzekutiv i organizatës INPO, z. Alban Haliti mbi rëndësinë e fuqizimit të bashkësive lokale në procesin e hartimit të buxhetit. Z. Haliti bëri një përmbledhje të procesit lidhur me procedurat dhe afatet ligjore nëpër të cilat kalon hartimi i buxhetit komunal, si dhe mënyrën se si INPO do të ndihmojë bashkësitë lokalë që kërkesat dhe projektet e tyre të adresohen dhe të reflektohen në propozimin e buxhetit të komunës së Prishtinës për vitin 2016.

Gjithashtu, në këtë takim, përfaqësuesit e bashkësive lokale të Komunës së Prishtinës, shfaqën opinionet e tyre lidhur me mungesën e komunikimit në mes të Komunës dhe këtyre bashkësive. Ata shprehën shqetësim ndaj komunës për mos shqyrtimin dhe mos trajtimin serioz të kërkesave dhe problemeve të tyre. Në këtë drejtim, ata kërkuan që Komuna të mbajë takime më të shpeshta me bashkësitë lokale, kërkesat e tyre të adresohen dhe të zgjidhen brenda një afati të arsyeshëm kohorë.

Disa prej propozimeve që dolën nga ky takim ishin që: Komuna të ndajë fonde të veçanta për bashkësitë lokale dhe t’iu jepet mundësia që bashkësitë lokale të zgjidhin problemet dhe nevojat e tyre duke e shfrytëzuar këtë fond, bashkësive lokale t’iu definohet statusi i përfaqësuesve të tyre, si dhe të krijohen kushtet e nevojshme ligjore për kompensimin e këtyre përfaqësuesve.