Shkollat e mesme të Ferizajt përsëri arenë e incidenteve.

15/04/2011

15 prill 2011 – Iniciativa për Progres dënon ashpër incidentin e ndodhur me 13 prill të këtij viti në hyrje të objektit të shkollës së mesme ekonomike “Faik Konica” në Ferizaj, ku një nxënës tek po dilte në pushim sulmohet me armë të ftohta nga një person i panjohur.
Rastet e incidenteve të tilla po mbahen të mbyllura për opinionin, si nga ana e menaxhmentit të shkollës, Drejtorisë së Arsimit dhe Policisë së Kosovës. Izolimi i këtyre rasteve nuk kontribuon në luftimin e kësaj dukurie kaq negative në shkollat e Ferizajt.
Ky rast nuk është rasti i parë i cili ndodhur në këtë shkollë, me 10 nëntor të vitit të kaluar në po të njëjtën shkollë kishte ndodhur një incident në mes të disa nxënëseve, ku ishin përdorur armë të ftohta. Prandaj INPO kërkon nga Drejtoria e Arsimit që të ndërmarr masa ndëshkimore ndaj drejtorit të kësaj shkolle.
Masat e ndërmarra nga Drejtoria e Arsimit për ngritjen e sigurisë në shkolla nuk ka gjetur zbatim të mjaftueshëm dhe nuk ka sjell rezultate të kënaqshme për parandalimin e kësaj dukurie negative.
Përkundër reagimeve te shumta të cilat janë bërë nga shoqëria civile, Këshilli i Nxënësve të Ferizajt, medieve etj, për ngritjen e sigurisë në objekte dhe hapësirat shkollore, kjo dukuri vazhdon të jetë prezentë në nivel shqetësues.
Mungesa e sigurisë së nxënësve në shkolla është një dukuri mjaft shqetësuese që po prek në vazhdimësi sistemin arsimorë në Ferizaj andaj, INPO kërkon nga Drejtoria e Arsimit e Ferizajt që të ndërmarr hapa konkret për parandalimin e kësaj dukurie siç janë; hartimi i një strategjie për parandalimin e dhunës në shkolla, sigurimi privat i shkollave,funksionalizimin e këshillave që veprojnë brenda shkollave, instalimin e përgjegjësisë për drejtorët mësimdhënësit dhe nxënësit, të kërkohet në përpikëri të zbatohet masat e ndërmarra ndëshkimore etj.
Në bazë të disa statistikave të Policisë së Kosovës në Ferizaj numri i incidenteve në shkollat e Ferizajt vetëm gjatë vitit të kaluar janë shënuar mbi 59 incidente. Kjo shifër është mjaft shqetësuese duke e pasur parasysh faktin se shkolla është vatër e diturisë dhe e edukimit të fëmijëve tanë.