“Pushtetin e keni nga qytetarët – ushtrojeni me qytetarët”

15/09/2011

Ferizaj, 15 shtator 2011 – Sot me rastin e Ditës Ndërkombëtare të Demokracisë organizata INPO ka realizuar një performanc me anë të së cilës i rikujton institucioneve publike dhe zyrtarëve publik për obligimin që kanë për përfshirjen e qytetarëve në vendimmarrje dhe funksionimin demokratik të institucioneve publike.
Me rastin e kësaj dite, INPO po ashtu do ti dërgoj një letër të gjithë zyrtarëve të lartë publik brenda Komunës së Ferizajt, Kaçanikut, Shtimes dhe Hanit të Elezit, e cila përshkruan një historik të shkurtë të Ditës Ndërkombëtare të Demokracisë dhe përhapja e saj nëpër vendet e ndryshme të botës, përfshirë edhe Kosovën. Ndër të tjera letra thekson:
Më shumë se 10 vite që nga fillimi i tranzicionit demokratik në Kosovë progres i madh është arritur, por ende mbetet shumë punë për tu bërë, në mënyrë që nga vend “pjesërisht i lirë” siç përshkruhet Kosova nga organizata “Freedom House”, të shndërrohet në vend “plotësisht të lirë”.
Prandaj, po ju drejtohemi me këtë letër të hapur që si zyrtar publik që jeni, keni obligim parasegjithash ligjor e më pas dhe moral që të ushtroni detyrat tuaja duke respektuar parimet bazë të demokracisë: transparencën, llogaridhënien dhe gjithpërfshirjen. Institucionet publike dhe zyrtarët publik që punojnë në to janë të zgjedhur dhe të emëruar për të qenë në dispozicion të qytetarëve dhe për të ofruar shërbime sa më të mira publike për ta.
Përmes kësaj letre ju bëjmë thirrje që të kontribuoni edhe më shumë në zhvillimin demokratik të institucionit që ju përfaqësoni, në mënyrë që Kosova të dëshmoj se e meriton të jetë pjesë e komunitetit të gjërë të shteteve demokratike dhe të përmbush aspiratat për anëtarësim në Bashkimin Evropian. Është në duart tuaja që të përcaktoni drejtimin e zhvillimit të shtetit të Kosovës – a do të jetë një demokraci e fortë me institucione gjithpërfshirëse, transparente dhe llogaridhënëse ndaj qytetarëve sikurse shumica e shteteve perëndimore; apo do të jetë një demokraci e brishtë e cila nuk i jep llogari qytetarëve të cilët i përfaqëson sikurse shumë shtete të lindjes.
Gjithashtu në kemi vendosur dhe një baner sensibilizues për qytetarë, duke i njohur me të drejtat e tyre dhe duke ju bërë thirrje që të kërkojnë të jenë pjesë e proceseve vendimmarrëse në Komunën e tyre.