Përfundon Turnamenti i parë Kombëtar në British Parliamentary “Ferizaj Open 2015”

29/09/2015

Iniciativa për Progres – INPO me mbështetje të Komunës së Ferizajt ka mbajtur turnamentin e parë kombëtar të debatit në formatin British Parliamentary “Ferizaj Open 2015”. Garat janë zhvilluar përgjatë dy ditëve ku pjesëmarrës ishin  të rinjë nga komuna të ndryshme si Ferizaj, Prishtinë, Gjilan, Mitrovicë, Prizren, Pejë, Podujevë dhe Skënderaj. Formati i debatit “British Parliamentary” rrjedh nga struktura e debatit në Parlamentin Britanik dhe është format i debatit i pranuar ndërkombëtarisht për gara Akademike dhe Universitare.

Gjatë ditës së parë (26 Shtator 2015) janë zhvilluar 4 raunde pre-eleminare ku ekipet pjesëmarrëse kanë garur mes vehte. Ndërkaq raundi i pestë, gjysmëfinalja dhe finalja janë mbajtur të Dielen. Ekipet finaliste ishin: Agjitatorët (OG), Hishi(OO),Emrin se kem ngjit na(CG) dhe Qikat e Gjonit(CO). Tema e finales ishte “Kjo shtëpi beson se feministet kosovare nuk duhet ta përkrahin Atifete Jahjagën”.

Gjykatës të këtij turnamenti ishin ish-debatues të cilët kanë marrë pjesë në gara të ndryshme ndërkombëtare të formatit British Parliamentary – BP.  Në fund fitues nga paneli i gjykatësve u shpall ekipi “Emrin se kem ngjit na” i përbërë nga Elona Gashi dhe Lirije Palushi. Gjithashtu u ndanë shpërblime edhe për 10 folësit më të mirë ku folësi më i mirë u shpall Endrit Dibrani.

Një kontribut të jashtëzakonshëm në organizimin e këtyre garave ka dhënë Fakulteti i Shkencave të Aplikuara Teknike në Ferizaj ku edhe është mbajtur turnamenti përgjatë dy ditëve.

Klubi i Debatit në kuadër të INPO-së që nga viti 2009 organizon dhe merr pjesë në gara të ndryshme të debatit të cilat deri më tani kanë qenë në një format tjetër “Karl Popper”, ndërsa tani kemi organizuar turneun e parë kombëtar të formatit BP dhe shpresojmë që kjo do të jetë një nismë e mbarë për organizime tjera.

Organizata INPO falënderon të gjithë ata që kanë kontribuar në organizimin dhe mbarëvajtjen e këtij turnamenti siç janë Komuna e Ferizajt, Fakulteti i Shkencave të Aplikuara Teknike dhe të gjithë vullnetarët të cilët kanë bërë një punë të palodhshme përgjatë këtyre dy ditëve.