Performansa, kundër ndërtimit të Kosova C me 2100 MW

02/07/2008

Ferizaj, 2 Korrik 2008 – Duke mbjellur dy fidane të cilat ndikojnë sadopak në përmirësimin e gjendjes së rëndë të ambientit në Kosovë, INPO si pjesë e koalicionit antikorrupsion, sot reagon kundër ndërtimit të termocentralit të ri “Kosova C” të planifikuar me kapacitet prodhues të energjisë prej 2100 MW. Qeveria e Kosovës, mandatin e kaluar kishte filluar procedurat për ndërtimin e termocentralit të ri energjetik të emërtuar “Kosova C” me kapacitet prodhues të energjisë 2100 MW, në këtë mënyrë duke rënë në kundërshtim me strategjinë energjetike të aprovuar nga Kuvendi i Kosovës e cila precizon se kapacitetet e reja që do të ndërtohen në vend nuk duhet të kenë kapacitet më të madh prodhues se 1000 MW dhe se investitorë gjithashtu duhet të jenë edhe institucionet e Kosovës, ndërkohë qe termocentrali i ri, do të ndërtohet vetëm nga investitori i huaj.

Përveç shkeljes së vendimit të Kuvendit, Qeveria e Kosovës, me ndërtimin e “Kosova C” me kapacitet prej 2100 MW, do të shkaktoj edhe shumë probleme të tjera, me të cilat duhet të përballen qytetarët jo vetëm të vendbanimeve ku parashihet të ndërtohet termocentrali i ri por gjithashtu edhe të pjesëve tjera të Kosovës.

Ndër pasojat më të mëdha që do të shkaktoj ndërtimi i termocentralit të ri këtë kapacitet prodhues, në bazë të analizave dhe opinioneve të shumë ekspertëve kosovar të lëmisë së energjetikës, janë ndotja e ambientit, dëmtimi i bujqësisë, ndotja e ujërave, zhvendosja e popullsisë, pasojat në ekonominë e vendit etj. Por ajo që është më e rëndësishmja, janë pasojat e mëdha ambientale, me të cilat duhet të përballen qytetarët e Kosovës e të cilat shkaktohen nga ndërtimi këtij termocentrali të ri.

Koalicioni antikorrupsion, që përbëhet nga organizatat joqeveritare të qendrave më të mëdha të Kosovës dhe i cili udhëhiqet nga organizata “Çohu”, pjesë e të cilit është edhe INPO, është duke realizuar një performansë të tillë si kjo në Ferizaj, në të njëjtën kohë në shtatë qendrat më të mëdha të Kosovës, duke kërkuar që termocentrali i ri të mos ndërtohet me kapacitet kaq të madh, por me 1000 MW, ashtu siq është e paraparë edhe me strategjinë e Kuvendit për energjetikën. Gjithashtu ky koalicion kërkon që edhe institucionet kosovare të marrin pjesë në investime në ndërtimin e kapaciteteve të reja të energjetikës dhe se qytetarët të jenë gjithashtu të përfshirë në debat dhe të jenë pjesë e vendimmarrjes në këtë drejtim.