Pas rekomandimit të INPO-s, Komuna e Vushtrrisë largon kriterin diskriminues dhe favorizues nga Dosja e Tenderit
28/08/2023Prishtinë, 28 gusht 2023 – Në kuadër të monitorimit sistematik të prokurimit publik, organizata INPO është duke monitoruar edhe aktivitetin e prokurimit me titull “Shërbime juridike për përfaqësim ligjor të Komunës”, me numër të prokurimit VU644-23-8311-2-2-1 dhe vlerë të parashikuar 50,000.00 Euro, të inicuar nga Komuna e Vushtrrisë.
Gjatë vlerësimit të rregullsisë ligjore të këtij tenderi, INPO ka gjetur se Komuna, në dosjen e tenderit dhe njoftimin për kontratë, ka aplikuar kërkesa dhe kritere të cilat janë në kundërshtim me ligjin për prokurim publik dhe rregullat e prokurimit, dhe të cilat favorizojnë drejtpërdrejt operatorë të caktuar ekonomikë. Respektivisht Komuna ka kërkuar që “Operatori ekonomik duhet të disponojë me objekt hapësirë – zyrë për ofrimn e shërbimeve e cila duhet të jetë në qytetin e Vushtrrisë”. INPO vlerëson se me këtë kriter ka diskriminuar operatorët ekonomikë të regjioneve të tjera, duke favorizuar kështu vetëm oepratorë ekonomikë të cilët gjenden në regjionin e komunës së Vushtrrisë.
INPO përmes komunikimit të brendshëm ka kërkuar nga zyrtari përgjegjës i prokurimit që të bëjë përmirësimin e dosjes së tenderit dhe dokumenteve tjera, duke eleminuar këtë kriter në mënyrë që të garantohet konkurueshmëria e lirë dhe e pakufizuar për të gjithë të interesuarit rreth këtij prokurimi, pavarësisht vendndodhjes së tyre.
Kësisoj, më 28.08.2023, Komuna e Vushtrrisë ka publikuar formularin standard B54 – për korrigjimin e gabimeve në njoftimet e publikuara, me ç’rast ka adresuar rekomandimin e INPO-s, duke larguar kriterin diskriminues dhe favorizues.
INPO vlerëson bashëpunimin e Komunës dhe inkurajon të gjithë personat e përfshirë në aktivitete të prokurimit në gjithë Kosovën që ta ushtrojnë drejt dhe me integritet pozitën zyrtare dhe të bashkëpunojnë për të përmirësuar prokurimin publik në Kosovë.
Për më shumë, shih formularin B54 të 28.08.2023 dhe Informacionet shtesë për OE: KËTU