“Pa konkurs, ndërrohet drejtoresha e PDK-së me atë të LDK-së, vazhdon klientelizmi”

05/11/2014

Reagim lidhur me emërimin e Drejtoreshës në Kopshtin e fëmijëve në Lagjen e Re

Ferizaj, 05 Nëntor-Duke pasur parasysh se kopshtet e fëmijeve themelohen dhe udhëhiqen në bazë të Ligji për Arsimin në Komunat, të Ligjit mbi Edukimin parashkollor dhe Ligjit mbi Shërbyesit Civil Nr. 03/L-149 neni 11, Komuna e Ferizajt shkel institucionin e konkursit duke emëruar drejtoreshën pa konkurs.

INPO ka reaguar më 15 Mars 2013 në kohën kur komuna ishte udhëhequr nga PDK-ja lidhur me rekrutimin e stafit të kopshtit pa konkurs, në atë kohë reaguan edhe parititë opozitare si LDK dhe VV për mos hapjen e konkursit për pranimin e punëtorëve. Tani kur pushteti ka ndrruar dhe LDK udhëheq me komunën, kjo udhëheqie nuk rrespekton parimet e Qeverisjes së mire, të cilat kishte proklamuar më herët.

Emërimin e këshilltares komunale znj. Arta Tahiri nga rradhët e LDK-së, si drejtoresh në Kopshtin e Fëmijëve në Lagjen e re, Komuna e Ferizajt pretendon se është bërë nga Cartitas Kosova. Kompetenca për punësim në edukimin parashkollor nuk mund të bartet tek një institucion privat sipas Ligjit për Arsimin në Komuna, neni 4. Komuna detyrohet, që për punësimin e stafit profesional, të hapë konkurs në pajtim me Ligjin mbi Shërbyesit Civil Nr. 03/L-149, neni 11, si dhe të përfshijë kërkesat lidhur me kualifikime në pajtim me Ligjin mbi Edukimin parashkollorë Nr. 02/L-52, neni 28.

Komuna e Ferizajt dhe Caritas Kosova kanë nënshkruar marrëveshje bashkëpunimi dhe bashkëfinancimi për “Funksionalizimin e Kopshtit të Fëmijëve në Ferizaj”, e ku në nenin 3 parashihet që Caritas Kosova do të menaxhoj dhe përcjell veprimtarinë e stafit profesional.

Këshilltarët që ndrruan subjektet po shpërblehen. Kalimi i znj. Tahiri nga këshilltare e VV në LDK u shpërblye me postin e drejtoreshës, ndërsa dy këshilltarët të PDK, të cilët kaluan në LDK, z.Avdullah Hoxha është shpërblyer me postin e menaxherit Financiar në kompaninë komunale “Bifurkacioni”, ndërsa znj. Zymrije Haxhimusa u shpërblye me punësim në ndërmarrjen komunale “Pastërtia”.

Mënyra e tillë e udhëheqies është klienteliste, andaj kërkojmë që Komuna e Ferizajt të ndërprej menjëherë një praktikë të tillë, të realizoj veprimtarinë e saj në përputhje me Aktet ligjore në fuqi, të respektoj institucionin e konkursit dhe të ofroj kushte të barabarta për punsim për të gjithë qytetarët.