Ndrrimi i pozitave të drejtorëve nuk e përmirëson performancën e pushtetit lokal
11/03/2015Ferizaj, 11 Mars 2015- Riciklimi i Drejtorëve dhe zhvendosja e tyre nga udhëheqja e një Drejtorie në udhëheqjen e Drejtorive të tjera Komunale, janë hap mbrapa i kryetarit Svarqa dhe nuk garantojnë qeverisje dhe performancë më të mirë të ekzekutivit. Lëvizja e Drejtorëve me qëllim të përmirësimit të performancës është vendim i pamatur, ngase me Drejtoritë Komunale nuk mund të eksperimentohet 1 vit dhe pastaj të pretendohet se të njejtit Drejtorë do të sjellin efikasitet dhe realizim të politikave zhvillimore në udhëheqjen e Drejtorive të reja. Këto ndryshime dëshmojnë për mungesën e aplikimit të standarteve dhe kritereve në procesin e emërimit të Drejtorëve Komunal, duke e fuqizuar kështu konceptin e qeverisjes ad-hoc nga dita në ditë, i cili nuk mbështetet në planifikim më afatgjatë dhe profesionalizëm.
INPO, kishte reaguar qysh në fillim të mandatit të kryetarit Svarqa, në Janar të vitit 2014, lidhur me procesin e përzgjedhjes së Drejtorëve Komunal, proces ky i përcjellë pa kritere të mirëfillta dhe profesionale dhe i negociuar nën parimin e ndarjes së kulaqit nën tavolinë, larg medias dhe publikut të gjerë.
Kërkimi i një ekipi më të mirë qeverisës nuk mund të zgjatet në këtë mënyrë, pasi që vet mandati i Kryetarit është 4 vite. Nëse vazhdohet me këtë logjikë të riciklimeve dhe kërkimeve të ekpit më të mirë, me qëllim të rritjes së performancës dhe efikasitetit në punë, atëherë do të afrohet fundi i mandatit të kryetarit dhe në Ferizaj nuk do të kemi politika zhvillimore dhe përmirësim të jetës së qytetarëve.
Përfundimisht, INPO i bënë me dije kryetarit Svarqa se performanca dhe efikasiteti i drejtorëve apo cilitdo nga zyrtarët e zgjedhur apo të emëruar brenda Komunës, duhet monitoruar dhe vlerësuar brenda një afati më të shkurtë kohor e jo të pritet një vit. INPO vlerëson se matja e performancës duhet t’i paraprijë ndryshimeve në ekzekutiv dhe ata të cilët kanë dështuar në përbushjen e obligimeve të tyre dhe kanë treguar performancë të dobët karshi detyrimeve të marra në Drejtorinë e caktuar, nuk meritojnë të jenë udhëheqës apo bartës të funksioneve publike në Drejtorinë tjetër, nga e cila varet mirëqenia e qytetarëve, dhe të njejtit duhet të mbahen në llogari për mospërbushjen e detyrimeve.
INPO i bën thirrje Kryetarit të Komunës, z. Svarqa, që të angazhohet maksimalisht që ekzekutivi i Komunës të ofrojë shërbime profesionale duke promovuar parimet e qeverisjes së mirë dhe efikase, e jo të mbetet peng i politikës.