Mos pastrimi i borës në rrugë dhe trotuare vë në sprovë komunën e Ferizajt

26/01/2012

Ferizaj, 26 janar 2012 –Bora e rënë ditëve të fundit përveç problemeve tjera, po shkakton vështirësi të mëdha në qarkullimin e lirë të njerëzve në Ferizaj, në të gjitha format e saj: shumica e rrugëve janë në gjendje të mjerueshme, me vështirësi të qarkullimit për vetura, trotuaret dhe shkallët publike të pa- pastruara të cilat paraqesin rrezik potencial për shëndetin e qytetarëve të Ferizajt; disa zona rurale si: fshati Mirashë, Cërnillë dhe Kosinë janë të izoluara kurse fshati Burrnik vazhdon të jetë i bllokuar, ngaqë Komuna e Ferizajt dhe kompania përgjegjëse për
mirëmbajtjen dimërore të rrugëve po tregohen të pa-afta për të menaxhuar një situatë të pritur dhe të parashikuar.

Kompania “Pastërtia”, përkundër shumave të mëdha vjetore që merr nga taksapaguesit Ferizajas nuk po arrin të përmbush obligimet e saja kontraktuale që të sigurojë qarkullim të lirë dhe të sigurt për qytetarët në rrugë dhe trotuare.

Është për të ardhur keq që kompania “Pastërtia” nuk ka vepruar që në ditët e para të reshjeve, gjë që ka zvogëluar efikasitetin e kryerjes së punëve dhe që kjo kompani nuk ka kapacitete për të menaxhuar një situatë të këtillë që përveç që ka qenë e pritur ka qenë edhe e parashikuar. E gjitha kjo ka detyruar Drejtorinë për Shërbime Publike dhe Emergjencë që të kontraktojnë edhe firmat private për t’iu ardhë në ndihmë. Firmat si “Eskskavatori”, “Begisholli”, “Rahovica”, “Papenburgu” dhe “Europarku” janë kontraktuarv për punë shtesë për t’i ndihmuar “Pastërtisë”, marrëveshja është bërë duke ju paguar atyre vetëm shpenzimet e derivateve, kurse pjesa tjetër e punës është vullnetare”

INPO kërkon nga Komuna e Ferizajt dhe Drejtoria e Shërbimeve Publike, që të mobilizohen dhe të ndërmarrin të gjitha masat e nevojshme për lirimin dhe pastrimin e rrugëve dhe trotuareve për qytetarët në mënyrë sa më ekspeditive.

Kërkojmë nga kompanitë e kontraktuara që të përmbushin obligimet e tyre kontraktuale dhe për të cilat paguhen nga paratë publike dhe të pastrojnë rrugët, trotuaret e në veçanti të zhbllokojnë rrugët e zonave rurale. Ndërsa në fund gjithashtu kërkojmë nga Komuna e Ferizajt që të mbajë përgjegjëse kompanitë në rast se ato nuk përmbushin obligimet e tyre të specifikuara me kontratat respektive.