Mbledhje Urgjente e Kuvendit të Komunës së Prishtinës

14/01/2015

Prishtinë e mërkure 14 janar – Në ora 10:00, filloj mbledhja e jashtëzakonshme e Kuvendit të Komunës së Prishtinës. Ku si pikë diskutimi ishte“Shqyrtimi dhe vlerësimi i punës së anëtarëve të komisioneve komunale të aksionarëve të ndërmarrjeve publike, të zgjedhur nga Kuvendi i Komunës së Prishtinës”.
Me fillimin e seancës u evidentua se mungon materiali i nevojshëm për diskutim ne mbledhje dhe se thirrja e kuvendit të komunës është në kundërshtim me rregulloren e punës së kuvendit dhe komiteteve. Më fillim fjalën e mori Kryesuesi i Kuvendit te Komunës z. Halim Halimi, i cili theksoi se kërkesa për zhvillimin e një seance te jashtëzakonshme ka ardhur nga përfaqësuesit e grupit të Lidhjes Demokratike të Kosovës, të cilët me kanë kërkuar që gjatë takimit të kuvendit të diskutohet funksionimi i Komisioneve Komunale te Aksionarëve KKA për ndërmarrjet publike komunale.

Me pas fjalën e mori z. Sami Hamiti përfaqësues i grupit të këshilltarëve të LDK-së i cili kërkoi që në këtë pikë të diskutohet puna e KKA-ve komunale si dhe zhvillimet e fundit ne NPL “ Pastrimi”, ku me që rast me vendim të bordit te drejtoreve te kompanisë është shkarkuar kryeshefi i deri tanishëm Feim Salihu. Sipas tij procedura e shkarkimit të z. Feim Salihu dhe emërimi si ushtrues detyre i z. Bardhyl Noci, është i kundërligjshëm dhe si e tille kjo çështje duhet të diskutohet në prani të këshilltarëve komunal të komunës së Prishtinës.
Pas përfundimit të fjalimit të z. Sami Hamiti, sipas rendit kryesuesi i dha fjalën z. Ylli Hoxha përfaqësues i grupit politik të Lëvizjes Vetëvendosje, i cili lidhur me çështjen nuk dëshiroi të prononcohej fare.
Më tutje edhe përfaqësuesit e tjerë të partive politike të përfaqësuara në kuvendin e komunës së Prishtinës, me radhë u deklaruan se lidhur me pikën për të cilën janë ftuar të diskutojnë nuk kanë marrë informacion të nevojshëm nga shërbimi i kuvendit. Më pas fjalën e mori Kryetari i Komunës z. Shpend Ahmeti i cili deklaroi se arsyeton se thirrja e seancës së jashtëzakonshme ka qenë e panevojshme pasi që akoma nuk është përmbushur afati ligjor për raportimin e punës së KKA-ve pranë kuvendit të komunës.
Pas një numri të madh diskutimesh nga këshilltarët e pranishëm u vlerësua se nuk ka kushte të mjaftueshme për zgjatur me tej diskutimin, ku njëkohësisht kërkuan nga kryesuesi i kuvendit që të obligoj komisionet komunale të aksionarëve që brenda shtatë ditëve të sjellin një raport pune për të diskutim në mbledhjen e rregullt të kuvendit.
Në fjalinë përmbyllëse të takimit të kuvendit kryesuesi z. Halim Halimi kërkoi që përfaqësuesit e pranishëm në sallë të votojnë për vendimin për raportimin e KKA-ve në kuvend dhe pezullimin e punës së këtyre të fundit deri në një vendim tjetër të kuvendit. Përmendja e pezullimit të punës së komisioneve komunale te aksionarëve, ngjalli reagim të ashpër tek këshilltarët e Lëvizjes Vetëvendosje, të cilët në mënyrë demonstrative së bashku me përfaqësuesit e Aleancës për Ardhmërinë e Kosovës AAK, Lëvizjes për Bashkim LB dhe Partinë e Fortë PF, lëshuan sallën e kuvendit. Në këtë situatë kryesuesi e hodhi propozimin në votim ku me që rast nga tollovia e krijuar nuk ishte e qarte se sa vota ishin për pikën e dhënë. Prezenca e një këshilltare të AAK-se znj. Besa Rafuna ne kuvend krijoi bindjen se edhe ajo ishte në përkrahje të propozimit, por një gjë e tillë u mohua nga ajo me më vonë. Prandaj vendimi i tillë mbetet të verifikohet nga Ministria e Administrimit dhe Pushtetit Lokal MAPL si autoritet kryesor i qeverisjes lokale ne vend.

Poashtu gjatë seancës se kuvendit janë përdorur fjalë denigruese nga këshilltarët dhe ekzekutivi komunës së Prishtinës. Një diskurs i tillë bie ndesh me kodin e mirësjelljes dhe rregulloren e punës së kuvendit te komunës.