Kryetari i Komunës së Prishtinës nuk respekton Ligjin për Vetëqeverisje Lokale

01/07/2014

Prishtinë,1 Korrik 2014 – Prishtina zyrtarisht është kryeqytet i Republikës së Kosovës, neni 13 pika 1 i Kushtetutës së Republikës së Kosovës, përcakton si kryeqendër të vendit. Si e tillë e ka barrën që të jetë model i qeverisjes lokale për komunat tjera.

Kryetari Shpend Ahmeti kishte premtuar se me ardhjen e tij në krye të Komunës së Prishtinës, do të jete shembull suksesi i qeverisjes së mirë, duke respektuar ne përpikëri ligjet që rregullojnë qeverisjen lokale ne vend. Kryetari Ahmeti është i obliguar që bazuar ne ligjin për vetëqeverisje lokale, të mbajë së paku dy takime me qytetarë, një në pjesën e parë të vitit, që përfshinë periudhën Janar – Qershor dhe periudhën e dytë të vitit Korrik – Dhjetor.

INPO është në dijeni për takimet me qytetarë te mbajtura nga ekzekutivi komunal, respektivisht z.Ahmeti, për çështje specifike në komunën e Prishtinës.

Diskutimet me qytetarë janë mekanizma kyç të demokracisë së drejtpërdrejt dhe përfshirjes se qytetarëve ne vendimmarrje. Këtu diskutohen sfidat, të arriturat komunale si dhe kërkesat, rekomandimet nga qytetarët prezent. Mirëpo, krahas kësaj Komuna duhet gjithsesi të respektoj në përpikëri edhe procedurat me të cilat rregullohen organizimi dhe mbarëvajtja e këtyre takimeve publike. Sipas LVL pika 68.1 “Çdo komunë mban periodikisht, së paku dy herë në vit, takime publike në të cilat mund të marrë pjesë secili person apo organizatë me interes në komunë. Data dhe vendi i takimit publikohet së paku dy javë përpara. Njëra nga mbledhjet mbahet gjatë gjashtë muajve të parë të vitit”

Kurse praktika e takimeve të deritashme, ka treguar që një procedurë e tillë ligjore nuk është respektuar. Afati i paraparë me ligjin për vetëqeverisjen lokale nuk është marrë parasysh, në takimet që janë organizuar nga Komuna e Prishtinës. Shembull konkret kemi konsultimet që janë zhvilluar si me banoret e lagjes Arbëria, Sofalia, etj., të cilët janë lajmëruar vetëm një ditë para takimit.

Do të ishte praktikë e mirë nëse Komuna e Prishtinës, gjegjësisht kryetari Ahmeti se bashku më të gjithë drejtorët e drejtorive komunale të mbajë një takim me qytetarë, për t’i njoftuar mbi gjendjen aktuale në të cilën është komuna, për realizimet e projekteve, gjendjen financiare dhe problemet më të cilat po përballet Komuna e Prishtinës për gjashtëmujorin e parë të këtij viti.

INPO bën thirrje Komunës së Prishtinës që të ketë parasysh ligjin për qeverisje lokale, statutin komunal dhe rregulloret komunale çdo herë që ndërmerr çfarëdo aktiviteti.