“Kopshti i Fëmijëve në Lagjën e Re prej themelimit funksionon jashtëligjshëm”

29/01/2015

Kopshti i Fëmijëve në lagjën e re që prej themelimit në vitin 2013 funksionon në mënyrë të jashtëligjshme, në kundërshtim me Ligjin mbi Edukimin Parashkollor.

Ferizaj, 29.01.2014 – Që nga themelimi i kopshtit të fëmijëve në lagjën e re e deri më sot, funksionimi i tij është përcjellë me paqartësi dhe shkelje ligjore. Marrëveshja me të cilën është themeluar ky institucion parashkollor nuk e definon nëse ky kopsht është publik apo privat. Punësimi i stafit edukativ që nga themelimi është bërë në kundërshtim me ligjin dhe mbi baza të nepotizmit dhe klientelizmit. Së fundi, emërimi i Drejtoreshës së kopshtit është bërë në kundërshtim me ligjin, ngase e njejta nuk posedon as kualifikimin minimal të kërkuar me ligj për të udhëhequr kopshtin. Kjo është vërtetuar edhe me vërejtjen të cilën Inspektorati i Arsimit në Ferizaj i ka dorëzuar kopshtit të fëmijëve ku sqaron se përgaditja profesionale e drejtoreshës së kopshtit nuk i plotëson kriteret e kërkuara ligjore për të ushtruar këtë detyrë.

Ligji mbi edukimin parashkollor njeh institucionet parashkollore publike të cilat themelohen nga Komuna, e cila edhe bartë përgjegjësinë për mjetet financiare dhe mbi menaxhimin e saj, si dhe njeh ato private të cilat themelohen dhe financohen nga personat juridik privat. Institucionet parashkollore private duhet të licencohen nga MASHT-i. Deri më sot, ende mbetet i paqartë statusi i këtij institucioni parshkollor. Kjo ka krijuar hapësirë për komunën që në çdo rast të shkeljeve të bartë përgjegjësinë tek Caritas Kosova, duke u thirrur në marrëveshjen e themelimit. INPO me 5 nëntor 2014 ka reaguar në lidhje me punësimin e personelit udhëheqës të kopshtit, duke kërkuar nga Komuna e Ferizajt të marrë përgjegjësitë ligjore që ka dhe të repektoj ligjin lidhur me punësimin e stafit edukativ dhe atij udhëheqës të kopshtit. Mirëpo edhe pas reagimit Komuna e Ferizajt jashtligjshëm po i delegon përgjegjësitë ligjore që i takojnë tek Caritas Kosova.

Më tej, INPO ka pranuar shumë ankesa dhe shqetësime nga vetë prindërit që dërgojnë fëmijët në këtë kopsht, se ata po diskriminohen sa i përketë pagesës, por edhe për kushte të tjera në kopsht. Në kopshtin e fëmijëve gjatë muajve të fundit disa prindër kanë paguar për dërgimin e fëmijëve në kopsht në vlerë prej 35 Euro dhe disa të tjerë 50 Euro në muaj. INPO i bënë me dije kryetarit të komunës se një prej parimeve kryesore të ligjit mbi edukimin parashkollor është barazia, kurse menaxhmenti aktual i padefinuar i kopshtit të fëmijëve po bënë shkeljen e këtij parimi duke aplikuar tarifa të ndryshme.

INPO kërkon urgjentisht nga Komuna e Ferizajt që të ndërhyjë duke rikthyer ligjshmërinë në funksionimin e kopshtit, të marrë përgjegjësitë ligjore që i takojnë dhe të kujdeset se punësimi i stafit edukativ dhe personelit udhëheqës të kopshtit të bëhet në përputhje me Ligjin mbi Edukimin Parashkollor dhe Ligjin për Shërbyesit Civil.

INPO i bënë thirrje komunës së Ferizajt që të merrë parasysh vërejtjet e inspektoratit të arsimit dhe të evitoj shkeljet ligjore.