Komunikatë për Media: Reagim ndaj Drejtorisë së UPKGJMM në Ferizaj

23/03/2012

Ferizaj, 23 mars 2012- INPO duke u mbështetur në Ligjin për Qasje në Dokumente Publike ditë më parë i ka kërkuar drejtorisë së Urbanizmit, Pronës, Kadastrit, Gjeodezisë dhe Mbrojtjes së Mjedisit qasje në Raportin për gjendjen mjedisore të komunës të vitit 2010 dhe 2011.

Sipas ligjit për Mbrojtje të Mjedisit dhe rregullores së Komunës së Ferizajt për Mbrojtjen e Mjedisit, Drejtoria e UPKGJMM në bashkëpunim më drejtoritë e tjera, është e obliguar që ti paraqes Kuvendit raportin një vjeçar për gjendjen mjedisore të Komunës, i cili përveç të tjerash duhet të përmbajë të dhëna për gjendjen ekzistuese të mjedisit dhe ndryshimet në mjedis, ndikimet mjedisore në shëndetin e banorëve të Komunës, dëmet, qëndrueshmërinë e përdorimit të burimeve natyrore, implementimin e planeve lokale për veprim në mjedis dhe planeve tjera, si dhe efektin e tyre në zhvillimin ekonomik etj.

Drejtoria i ka refuzuar INPO-së qasjen në këtë dokument me arsyetimin se Plani Lokal i Veprimit në Mjedis është i publikuar në ueb faqen zyrtare të Komunës si dhe raportet e drejtorisë përveç anëtarëve të kuvendit ju dorëzohen edhe medieve e shoqërisë civile. Arsyetimi është i pabazë dhe nuk ka të bëjë me dokumentin të cilin INPO e ka kërkuar.
INPO ju bën me dije se ky dokument nuk i është paraqitur asnjëherë Kuvendit dhe as që është hartuar ndonjëherë. Kjo dëshmon se marrëdhëniet mes ekzekutivit dhe legjislativit të komunës janë të nivelit të ulët, ekzekutivi i Komunës as që mundohet të përmbush obligimet e veta ligjore që i ka ndaj Kuvendit dhe qytetarëve mirëpo as kuvendi nuk po mund të ushtroj kontroll dhe të kërkojë llogari nga ekzekutivi.

INPO i bën thirrje Kuvendit të Komunës që të kërkoj nga ekzekutivi që të përmbushin detyrat dhe obligimet e veta të cilat burojnë nga aktet ligjore të Republikës së Kosovës dhe Komunës së Ferizajt, ndërsa Drejtorisë së UPKGJMM i kërkojmë që publikisht të sqaroj arsyet e mos ekzistimit të raporteve për Gjendjen në Mjedis.