Komunikatë për media
08/06/2011INPO ka përcjellur me kujdes shpalljen dhe përmbylljen e konkursit për vendin e punës për Zyrtar të Njësisë së Informimit në Kuvendin e Komunës së Ferizajt.
Ky konkurs ishte shpallur më 21 mars 2011 dhe kualifikimet e kërkuara për këtë konkurs ishin: shkolla e mesme – drejtimi i shkencave shoqërore apo shkencore. INPO kishte reaguar për mënyrën e shpalljes së konkursit dhe kualifikimeve të kërkuara duke i dërguar Kryetarit të Komunës dhe Drejtorit të Administratës dhe Personelit një reagim ku në mes të tjerash kishte kërkuar anulimin e këtij konkursi dhe lejimin e pjesëmarrjes së INPO-së në panelin vlerësues gjatë intervisitimit të kandidatëve për këtë pozitë.
INPO ishte informuar se i gjithë procesi ka qenë i montuar paraprakisht dhe kualifikimet e shpallura në konkurs kanë qenë të përshtatura me kualifikimet e një personi që ishte caktuar për të marrë këtë pozitë.
Pas presionit të INPO-së Konkursi në fjalë nr. 02-07/4 të datës 21 mars 2011 është anuluar nga Drejtori i Administratës dhe Personelit. Me datë 27 prill 2011 Komuna e Ferizajt publikon konkursin e dytë për këtë pozitë duke kërkuar që aplikantët për këtë pozitë të kënë përgatitje superiore apo të mesme.
INPO konsideron se kualifikimet e kërkuara me këtë konkurs janë tejet të ulëta dhe jo-serioze duke pas parasysh se komuna e Ferizajt numëron qindra studentë si dhe kuadro të diplomuara dhe të profesionalizuara në gazetari, komunikim masiv, administratë publike a fakultete relevante për këtë pozitë.
INPO është takuar me Drejtorin e Administratës dhe Personelit z. Vesel Zhinipotoku dhe kemi kërkuar që kjo Drejtori të promovojë transparencë dhe bashkëpunim me shoqërinë civile dhe jemi dakorduar që INPO në bashkëpunim më këtë Drejtori të hartojë mënyrën e intervistimit të kandidatëve dhe të hartojë pyetjet për intervistë, si dhe të jëtë prezente gjatë intervistimit në cilësinë e vëzhguesit. Mirëpo INPO nuk është kontaktuar më nga Drejtoria e Administratës dhe Personelit dhe procedurat e intervistimit janë bërë “fshehurazi” duke mos na vënë në dijeni.
INPO konsideron se Zyrtari i Njësisë së Informimit në Komunën e Ferizajt është emëruar politikisht duke mos lejuar konkurrencë të drejtë dhe konkurs profesional për këtë pozitë.
INPO është informuar nga burime dytësore se ka pasur kandidatë me përgatitje profesionale edhe më të denjë për këtë pozitë me ç’rast kemi kërkuar qasje në dokumentacionin e vlerësimit të kandidatëve dhe CV-ve të tyre mirëpo një gjë e tillë nuk iu është lejuar zyrëtarëve të INPO-së, me arsyetimin se këtë të drejtë e ka vetëm auditori i brendshëm ose i jashtëm dhe komisioni për shërbyes civil.
Sikurse edhe në të kaluarën, edhe ky punësim përmes konkursit, i personave në bazë të ngjyrimeve politike të tyre në pozita të shërbyesve civil, është një praktikë e rrezikshme dhe aspak pozitive që Komuna e Ferizajt është duke krijuar. Një gjë e tillë përveç që është shkelje e institucionit të konkursit dhe parimeve të meritokracisë, është një ngulfatje për frymimin demokratik të institucioneve publike në Ferizaj dhe një dekurajim për kuadrot më profesionale dhe më të përgatitura që të konkurrojnë dhe të synojnë të punojnë për institucionet publike në Ferizaj.
Zyrtari i Njësisë së Informimit duhet të ketë përgaditje të lartë profesionale duke pasur parasysh se ai është zë unifikues dhe pasqyron tërë punën e institucioneve komunale e jo të jetë zyrtar partiak i partisë në pushtet.