Komuna nuk po dëshiron ta ndal “degradimin zyrtar” urbanistik të Ferizajt, ndërsa prokuroria heshtë

10/12/2015

Ferizaj, 10 Dhjetor 2015 – Planifikimi dhe zhvillimi hapësinor-urban i mirëfilltë dhe në interes të zhvillimit të qëndrueshëm, gjithëpërfshirës dhe efikas është tregues i qartë për qeverisje të mirë dhe demokratike. Fatkeqësisht kjo nuk po ndodh në qytetin e Ferizajt. Qeverisja komunale në Ferizaj tash e sa kohë po dështon në krijimin e politikave dhe praktikave të mira për zhvillimin dhe menaxhimin urban të qytetit. Kjo tregohet edhe me shembullin e fundit të Komunës së Ferizajt e cila inicioi revidimin e planeve rregulluese urbane për zonën I dhe VIII-të të qytetit.

Sipas të gjeturave të organizatës INPO, qysh në vitin 2014, kur edhe është marrë vendimi për Inicimin e Procesit të Ndryshimit dhe Plotësimit të Planeve Rregulluese me Fokusim të Veçantë të Shqyrtimit të Koeficientit të Ndërtimit për Zonën e I-rë dhe të VIII-të, ka qenë gjithçka joligjore duke u përcjell më pas me shkelje të njëpasnjëshme ligjore, përmbajtjesore dhe procedurale, e deri te shkeljet më të rënda ato të falsifikimit të dokumenteve zyrtare.

Duke mos dash që qyteti i Ferizajt të ndërtohet në mënyrë të paligjshme, INPO, muaj më parë, përmes reagimeve publike ka kërkuar nga kryetari i komunës z. Muharrem Svarqa që të anuloj tërë procesin e revidimit të këtyre dy planeve rregulluese dhe njëherësh të shkarkojë nga detyra drejtorin e Drejtorisë së Urbanizmit dhe Mjedisit z.Faik Grainca, si përgjegjësin kryesor për gjithë procesin e mbrapshtë të revidimit të zonave, si dhe të angazhohet seriozisht në garantimin e ligjshmërisë së këtij procesi duke i anashkaluar interesat e individëve apo grupeve të caktuara.

Gjithashtu, INPO përmes një shkrese zyrtare ka kërkuar nga Prokuroria Themelore në Ferizaj që të filloj hetimet lidhur me dyshimin e bazuar se “zyrtarë komunal kanë konsumuar elemente të veprave penale të falsifikimit të dokumenteve zyrtare dhe keqpërdorimit të pozitës apo autoritetit zyrtar”.

Por, thirrjet ndaj institucioneve që janë përgjegjëse që të sigurojnë sundimin e ligjit dhe praktikave demokratike, kanë hasur në vesh të shurdhër dhe akoma nuk është parë ndonjë veprim konkret, i cili do të pamundësonte cenimin e të drejtave qytetare për një qeverisje të mirë, transparente dhe mbi te gjitha, të ligjshme.

Si pasoj e veprimeve të jashtëligjshme, dhe mosgatishmërisë së kryetarit të komunës që të intervenoj në kohë dhe të mbajë përgjegjës dhe llogaridhënës të gjithë ata që i kontribuuan këtij procesi të jashtëligjshëm, komuna e Ferizajt tashmë rrezikon që të humb qindra mijëra euro të buxhetit të saj, për shkak të deponimit të padive në gjykata kompetente për realizmin e dëmshpërblimit nga ana e investitorëve, të cilëve u janë pezulluar lejet e ndërtimit për shkak të kontestueshmërisë së procesit të revidimit.

Për më tepër, komuna nuk ka marrë për bazë as katër shkresat të përcjella me rekomandime të komisionit të përbashkët të Ministrisë së Mjedisit dhe Planifikimit Hapësinor dhe Ministrisë së Administrimit të Pushtetit Lokal si dhe Vendimit të Inspektoratit të Ministrisë së Mjedisit dhe Planifikimit Hapësinor, që të rikthejnë në rishqyrtim Vendimin për Inicimin e Procesit të Revidimit të Planit Rregullues për zonën e I-rë dhe VIII-të, si dhe planet rregulluese të hartohen, revidohen dhe harmonizohen sipas procedurave, terminologjisë dhe përmbajtjes së paraparë me Ligjin Nr.04/L-174 për Planifikim Hapësinor. Komuna e Ferizajt nuk ka arritur dhe nuk po gjen vullnetin e mirë që t’i zbatoj këto rekomandime dhe urdhëresa, dhe për pasojë vazhdojnë të prodhojë dokument pas dokumenti, vendim pas vendimi, të cilët në fund rezultojnë të jenë të pa harmonizuar dhe të pabazuar në ligje dhe plane strategjike, të cilat i përcaktojnë caqet afatgjata të zhvillimit ekonomik, social dhe hapësinor.

Ligjshmëria e vendimeve të fundit të Kuvendit të Komunës së Ferizajt, për inicimin e procesit të revidimit për këto zona (Vendimi 01.Nr.103 dhe 01.Nr.104, të datës 29.09.2015) është kontestuar edhe nga ana e komisionit ndërministror, për shkak se nuk janë hartuar në harmoni me nenin 11 të Ligjit Nr.04/L-174 për Planifikim Hapësinor. Për më tepër, komuna e Ferizajt ende nuk ka arritur që ta zbatoj rekomandimin e këtij komisioni që brenda 30 ditëve të bëjë rishqyrtimin e vendimeve në Kuvend.

INPO vlerëson se është jashtë të gjitha kritereve profesionale dhe menaxhuese që drejtori i Drejtorisë së Urbanizmit, në të kaluarën kryetar i komunës, të mos arrijë të hartoj dokumente dhe politika të mira dhe të bazuara në ligjet e aplikueshme të Republikës së Kosovës dhe të mos i  zbatoj rekomandimet e institucioneve mbikëqyrëse lidhur me këtë proces.

Për më tepër, INPO e ka shqyrtuar edhe dosjen e tenderit dhe kontratat të cilat i ka lidhur komuna e Ferizajt me kompaninë fituese për hartimin e projektit për revidimin e zonave urbane. Në bazë të hulumtimit, INPO ka gjetur se paramasat dhe detyrat projektuese për revidimin e zonës I-rë dhe VIII-të, të cilat i ka hartuar Drejtoria e Urbanizmit, janë identike me njëra tjetrën dhe nuk  specifikojnë qartë se çka kërkohet që të ndryshohet ose plotësohet në këto zona. Rrjedhimisht, është e pamundur që dy zona në pozita strategjike tërësisht të ndryshme nga njëra tjetra, të kenë nevojën e ndryshimit dhe intervenimit nën të njëjtat kritere dhe të njëjtat specifika. Tutje, me gjithë paqartësitë lidhur me detyrat projektuese, Komuna e Ferizajt ka shpenzuar afër 20 mijë euro për hartimin e këtyre projekteve të cilat nuk po arrijnë të gjejnë zbatim.

Bazuar edhe në këto të gjetura, INPO me të drejtë dyshon se “revidimi i planeve rregulluese ka qenë i orkestruar për t’i shërbyer personave të caktuar, të cilët kanë pasur interes të drejtpërdrejtë në ngritjen e koeficientit të ndërtimit”. Përndryshe, po qe se revidimi i zonave urbane do të ishte iniciuar nën arsyeshmërinë e zhvillimit të përgjithshëm urban të qytetit dhe nevojave reale të qytetarëve, si dhe procesi të udhëhiqej nga njerëz profesionist dhe pa apetite të tjera, komuna e Ferizajt a priori nuk do të ballafaqohej me konteste të tilla ligjore dhe procedurale.

Andaj, INPO me ngulm kërkon nga kryetari i komunës që të shkarkoj nga pozita drejtorin e Drejtorisë së Urbanizmit, të mbajë llogaridhënës të gjithë ata zyrtarë që në një formë ose tjetër i kanë kontribuuar këtij procesi të paligjshëm, si dhe sa më parë të ndërmarrë të gjitha veprimet e nevojshme ligjore për sigurimin e ligjshmërisë së këtij procesi. Njëherësh thërret organet e drejtësisë që fillojnë hetimet e këtij procesi dhe personat përgjegjës për këto parregullsi t’i nxjerr para drejtësisë.