Komuna e Prishtinës, po injoron kërkesat për qasje në dokumente publike
11/11/2013Prishtinë, 11 Nëntor 2013 – Komuna e Prishtinës nuk përgjigjet në kërkesat për qasje në dokumente publike, duke e injoruar në tërësi afatin kohorë i cili është i paraparë me ligjin për qasje në dokumente publike.
Komuna si institucion publik nuk po respekton ligjin për qasje në dokumente publike. Sipas këtij ligji, çdo kërkesë e cila i adresohet institucionit përkatës, institucioni në fjalë ka për obligim të përgjigjet në afat kohor prej 7 ditësh.
INPO gjatë muajit tetor ka bërë pesë kërkesa për qasje në dokumente publike në Komunën e Prishtinës, ku komuna nuk është përgjigjur në asnjërën prej tyre. Kërkesat kanë pasur të bëjnë me informata mbi punën e Komunës, e cila është e përcaktuar më Ligjin për Vetëqeverisje Lokale dhe rregulloret tjera në fuqi. Kërkesat kanë qenë si në vijim: KJ2013PR/34 në këtë kërkesë është kërkuar nga komuna gjegjësisht nga Drejtoria e Infrastrukturës Lokale që të informoj më në detaje lidhur me ndërtimin e rrugëve urbane me infrastrukturë përcjellëse apo saktësisht pika 1.4.2.1, ku për këtë linjë buxhetore janë paraparë 3,000,000 euro.
Gjithashtu e njëjta kërkesë iu është bërë edhe për linjën buxhetore prej 1.4.2.2 e cila është paraparë për ndërtimin e rrugëve rurale, ku për këtë linjë buxhetore janë ndarë 2,500,000 euro. Njëkohësisht INPO ka kërkuar listën e rrugëve të cilat planifikohen të ndërtohen gjatë vitit 2014. Kërkesat e tjera kanë pasur të bëjnë me bashkëpunimin e Komunës së Prishtinës me komunat tjera dhe realizimin e ndonjë projekti të përbashkët, marrëveshjet e komunës me lagjet dhe vendbanimet e saj, funksionimin e auditorit të brendshëm komunal si dhe raportin e këtij të fundit mbi performancën e komunës gjatë vitit 2012
INPO vlerëson së Komuna e Prishtinës ka bërë shkelje të Ligjit për Qasje në Dokumente Publike duke mos kthyer përgjigje në asnjërën prej kërkesave në fjalë.