INPO: Pengimi i fjalës së anëtarit të kuvendit komunal cenon rëndë lirinë e shprehjes dhe të drejtën e përfaqësimit
01/03/2022INPO reagon kundër gjuhës jo parlamentare dhe sjelljes jo profesionale të kryesuesit të Kuvendit kundrejt anëtarëve të Kuvendit Komunal të Ferizajt.
INPO është e shqetësuar dhe shpreh keqardhje për gjuhën e përdorur dhe ndërprerjen e fjalës nga kryesuesi i Kuvendit Komunal të Ferizajt, z. Xhavit Zariqi, ndaj anëtarit të Kuvendit Komunal z. Amir Rexhepi.
Në seancën e tretë të Kuvendit Komunal të Ferizajt, pika e gjashtë (6) e rendit të ditës “Propozim-vendim për themelimin e komisionit të Kuvendit Komunal për zgjedhjen e Këshillave Lokal”, u bë shkak deri te një përplasje në mes të kryesuesit të Kuvendit Komunal z. Xhavit Zariqi dhe anëtarit të Kuvendit Komunal z. Amir Rexhepi. Ky i fundit kërkoi informatë se a do të paguhen kryetarët e këshillave lokal dhe nga kush, meqë sipas tij është miratuar Rregullorja për atë qëllim, mirëpo kryesuesi i Kuvendit e mohoi një gjë të tillë, duke i sugjeruar që t’i paguajë ata me buxhetin e tij vetanak.
Anëtari i Kuvendit z. Rexhepi vazhdoi të insistonte se ekzistonte një e drejtë e tillë në bazë të Rregullores komunale, ndërsa kryesuesi i kthehet me një ton të ashpër “Boll ma”, kështu duke i ndërprerë fjalën dhe mohuar të drejtën e shprehjes.
Kjo situatë e krijuar në Kuvend dhe gjuha e përdorur nga kryesuesi i Kuvendit cenon rëndë angazhimin e anëtarit të Kuvendit Komunal që t’i përmbush detyrat e tij përfaqësuese për qytetarët e Komunës së Ferizajt dhe si e tillë cenon edhe lirinë e shprehjes së anëtarit të Kuvendit Komunal.
INPO i bënë me dije kryesuesit të Kuvendit Komunal se sipas nenit 16 të Rregullores për Organizimin, Funksionimin, dhe Bashkëpunimin e Komunës me Fshatrat, Vendbanimet dhe Lagjet Urbane, të miratuar në kohën kur kryesuesi ishte anëtar i Kuvendit Komunal dhe në bazë të Vendimit 01.Nr.49 të datës 05.05.2021 të Kuvendit Komunal, kompensimi i kryetarëve të këshillave lokal është i obliguar dhe është ekuivalent me shumën që marrin anëtarët e komiteteve obligative.
Organizata INPO dënon gjuhën e përdorur nga kryesuesi i Kuvendit Komunal ndaj anëtarëve të Kuvendit dhe bënë thirrje që situata të tilla të mos përsëriten në të ardhmen, përkatësisht mbledhjet të udhëhiqen në mënyrë profesionale dhe të mos cenohet e drejta e përfaqësimit dhe lirisë së shprehjes.
Gjithashtu, INPO kërkon që diskutimet dhe debatet të cilat zhvillohen në Kuvend të jenë përmbajtësore, profesionale, duke respektuar Rregulloren e Punës së Kuvendit dhe Kodin Etik, me qëllimin e vetëm që qytetarët të përfaqësohen në mënyrë sa më kualitative dhe vendimet që nxirren nga Kuvendi të ndikojnë në mirëqenien dhe kualitetin e jetës së qytetarëve.