INPO mbanë tryezë diskutimi me temë: “Luftimi i Korrupsionit në Prokurimin Publik”

07/12/2022

 

Prishtinë, 07 dhjetor 2022 – Organizata Iniciativa për Progres (INPO), në kuadër të “Javës Kundër Korrupsionit 2022”, ka organizuar tryezë diskutimi me temë: “Luftimi i Korrupsionit në Prokurimin Publik”.

Znj. Albulena Nrecaj, Drejtore Ekzekutive në organizatën INPO, e hapi tryezën duke përshëndetur të ftuarit dhe duke i falënderuar për pjesëmarrjen. Znj. Nrecaj, theksoi se INPO në vazhdimësi dhe në mënyrë sistematike e monitoron prokurimin publik dhe në vazhdimësi publikon hulumtime dhe raporte të cilat evidentojnë shkelje të ligjeve në fuqi gjatë udhëheqjes së procedurave të prokurimit publik.

Pas fjalës hyrëse të znj. Nrecaj, fjala u kalua tek z. Qëndrim Arifi, Hulumtuesi i Lartë në INPO, i cili para të pranishmëve prezantoj gjetjet e vazhdueshme të INPO-s në prokurimin publik, me theks të veçantë korrupsionin dhe keqpërdorimit të parasë publike, duke filluar nga kriteret diskriminuese në dosje të tenderëve, lidhja përkundër ekzistimit të konfliktit të interesit, ekzekutimi i pagesave pa i pranuar furnizimet, shërbimet apo punët e caktuara, e kështu me radhë.

Pas prezantimit të gjetjeve të INPO-s, fjala u kalua tek z. Osman Vishaj, Kryetar i Bordit të Komisionit Rregullativ për Prokurimin Publik (KRPP), z. Vishaj vlerësoi lartë punën e organizatës INPO, njëherit potencoi se KRPP është duke u angazhuar vazhdimisht në zbatimin e procedurave të prokurimit publik në përputhje me dispozitat ligjore.

Për një fjalë rasti, fjala u kalua tek anëtarja e Bordit të Organit Shqyrtues të Prokurimit (OShP), znj. Kimete Gashi, e cila pas falënderimit të organizatës INPO për punën në kuadër të rritjes së ligjshmërisë, transparencës dhe llogaridhënies në prokurimin publik, ajo gjithashtu ofroi mbështetje të plotë të OShP-së në këtë drejtim. Znj. Gashi, gjithashtu u zotua që vendimet e OShP-së do të jenë meritore dhe në përputhje të plotë me ligjin. Pas znj. Gashi, fjala kaloi tek z. Bezad Halilaj, Zëvendës Auditor i Përgjithshëm në Zyrën Kombëtare të Auditimit (ZKA), z. Halilaj potencoi se ZKA në vazhdimësi auditon edhe kontratat e prokurimit publik dhe problemet më të theksuara dhe të përsëritura prej vitit në vit janë keq menaxhimet e kontratave.

Në vazhdim të tryezës fjala u kalua tek z. Afrim Atashi, Drejtor i Departamentit të Parandalimit të Korrupsionit në Agjencinë Kundër Korrupsion (AKK), z. Atashi prezantoj punën e AKK-së në këtë drejtim dhe duke treguar për bashkëpunimin dhe ndihmën e OShC-ve në kuadër të parandalimit të korrupsionit. Pas fjalës së z. Atashi, fjala kaloj tek pjesëmarrësit tjerë të cilët ishin nënkryetar të komunave, Zyrtar Përgjegjës të Prokurimit, përfaqësues të institucioneve të ndryshme dhe pjesëtarë nga shoqëria civile.

Gjatë diskutimit u pasqyruan problemet dhe sfidat me të cilat ballafaqohen autoritetet kontraktuese dhe institucionet ligj zbatuese në fushën e prokurimit publik dhe u vë në pah fakti se është domosdoshmëri mbajtja para përgjegjësisë e zyrtarëve që shkelin procedurat e prokurimit publik dhe keqpërdorin paranë publike.

Tryeza u përmbyll me rekomandimin se lufta kundër korrupsionit duhet të jetë e pa kompromis dhe se vetëm ndëshkimi i veprave korruptive ndikon në çrrënjosjen e kësaj dukurie shumë negative për shoqërinë tonë.