INPO kundërshton themelimin e Drejtorisë për Rini në Komunën e Ferizajt
16/05/2015Ferizaj, 16 maj 2015 – Ditëve të fundit, një grup i organizatave jo-qeveritare, grupime të të rinjve dhe disa Forume Politike rinore të partive politike në Komunën e Ferizajt kanë dalë me propozimin për themelimin e Drejtorisë për Rini, e cila do të funksiononte si drejtori e ndarë nga ajo e tanishmja, pra Drejtoria për Kulturë, Rini dhe Sport. Organizata INPO me këtë rast kundërshton idenë e krijimit të kësaj drejtorie në bazë të një numri arsyesh pse kjo drejtori nuk është e nevojshme dhe pasojat të cilat do të dilnin në rast themelimi të kësaj drejtorie.
INPO vlerëson se zgjidhja e problemeve që përballen të rinjtë e Komunës së Ferizajt duhet të bëhet brenda institucioneve dhe resoreve të përcaktuara me Statutin aktual të Komunës, më konkretisht brenda Drejtorisë për Kulturë, Rini dhe Sport. Duke vlerësuar gjithashtu se pozicioni i të rinjve në shoqëri dhe pjesëmarrje e tyre në vendimmarrje është e vogël, INPO konsideron se është më racionale që të kërkohet fuqizimi i rolit të të rinjëve përmës DKRS, si dhe të kërkohet një masë më e madhe e llogaridhënjes nga kjo drejtori. Themelimi i drejtorive të reja me idenë se ajo aktualja nuk po arrinë të ndëgjoj zërin e të rinjve nuk jep mbështetje se ky zë do të dëgjohet brenda një drejtorie të re. Gjithashtu, ideja për krijim të drejtorive vetëm tregon paaftësi në menaxhim të detyrave dhe përgjegjësive, edhe ashtu të parapara dhe të qarta për fuqizimin e rolit të të rinjve në shoqëri dhe vendimmarrje.
Themelimi i Drejtorisë për Rini do të shërbejë si një vegël shtesë për pushtetin e tanishëm dhe ato të ardhshme për të rritur prezencën politike të njerzve të afërt me këto parti. Duke qenë dëshmitarë të një mënyre të qeverisjes e cila në raste të shumta mundohet t’u shërbejë interesave të grupeve të caktuara të shoqërisë, të lidhura me partitë në pushtet, themelimi i drejtorisë do të shërbente si një mundësi më shumë për të rritur këtë mbështetje për këto grupe. Në fund të cilitdo proces, jemi dëshmitar të politizimit të skajshëm të grupeve të moshave të ndryshme shoqërore, e më shqetësuese për INPOn është politizimi i të rinjëve. Ky politizim ka rezultuar deri më tash në ngulfatje të mendimit të pavarur dhe kritik ndaj proceseve që ka kaluar shoqëria, por gjithashtu ka nxitur kulturën e klientelizmit tek të rinjtë.
Andaj, INPO u bënë thirrje propozuesve dhe përkrahësve të kësaj ideje, që bashkarisht të kërkohet nga DKRS rritje në masë të konsiderueshme të mbështetjes financiare të projekteve për të rinjtë, të fuqizohen strukturat përfaqësuese rinore, si Këshilli i Veprimit Rinor Lokal, të kërkohet llogaridhënje dhe transparencë më e madhe nga kjo drejtori në mënyrë që të rinjtë të jenë të përfaqësuar dhe pjesë e vendimmarrjes në strukturat udhëheqëse të Komunës së Ferizajt.