INPO: Komuna e Hanit të Elezit kundërligjshëm avancon në pozitë zyrtaren financiare

16/05/2022

Prishtinë, 16 maj 2022 – INPO reagon kundër vendimit të Kryetarit të Komunës së Hanit të Elezit z. Mehmet Ballazhi, i cili kundërligjshëm avancon në detyrë zyrtaren financiare në Zyrtare Kryesore Financiare të organizatës buxhetore.

INPO në kuadër të monitorimit sistematik të komunave ka hasur në një avancim të kundërligjshëm në Komunën e Hanit të Elezit, bëhet fjalë për vendimin Nr. 2152/2022, i datës 23.03.2022, me të cilin vendim zyrtarja financiare avancohet në pozitën e Zyrtares Kryesore Financiare.

Pas marrjes së informatave për një avancim të tillë, INPO më 22 prill 2022, në drejtim të Komunës së Hanit të Elezit ka parashtruar kërkesë për qasje në dokumente publike ku ka kërkuar: Konkursin e brendshëm për avancime të shpallur nga Komuna e Hanit të Elezit dhe Vendimin për avancimin e zyrtares financiare në zyrtare kryesore financiare. Komuna ka ofruar vendimin për avancim, ndërsa sa i përket konkursit të brendshëm ka deklaruar se nuk është hapur konkurs për këtë pozitë.

Mos shpallja e konkursit të brendshëm për avancim në detyrë, bie në kundërshtim të plotë me Ligjin nr.06/L-114 për Zyrtarët Publik, Rregulloren nr.16/2020 për pranimin dhe karrierën në shërbimin civil të Republikës së Kosovës dhe Rregulloren nr.01/2022 për pranimin, vlerësimin dhe disiplinën e nëpunësve të lartë drejtues. Në të gjitha këto dispozita ligjore kërkohet që për këto avancime të shpallet konkursi i brendshëm, testimi, vlerësim e pastaj të merret vendimi për avancim. Konkretisht, Komuna e Hanit të Elezit ka vepruar në kundërshtim me Ligjin për Zyrtarët Publik, përkatësisht nenin 39 par. 3, i cili përcakton se: “Ngritja në detyrë realizohet nëpërmjet një procedure konkurruese të organizuar nga Njësia e Burimeve Njerëzore të institucionit, që ka pozitën e lirë“.

Po ashtu, Rregullorja për Pranimin dhe Karrierën në Shërbimin Civil të Republikës së Kosovës, në nenin 55 par.1 dhe 2 përcakton qartë se avancim në detyrë realizohet duke ndjekur hapa konkret, e që në këtë rast është shpallja e konkursit. Tutje, kjo Rregullore kërkon nga çdo njësi përgjegjëse që procedurat për avancim në detyrë të zhvillohen konform akteve ligjore dhe nënligjore.

Për më tepër, Komuna e Hanit të Elezit nuk ka respektuar as Rregulloren në të cilën është thirrur gjatë marrjes së vendimit. Në vendimin për avancim, komuna është thirrur në Rregulloren për Pranimin, Vlerësimin dhe Disiplinën e Nënpunësve të Lartë Drejtues, përkatësisht nenin 4,  i cili taksativisht kërkon që të respektohet neni 6 i Ligjit për Zyrtarët Publik, e në nenin 6 potencohet qartë se procesi i përzgjedhjes dhe ngritjes në detyrë duhet të zhvillohet në mënyrë transparente dhe të garantoj mundësi të barabarta për gjithë nëpunësit civil, gjë e cila nuk ka ndodhur në këtë rast.

Andaj, duke u bazuar në këto gjetje INPO kërkon nga Kryetari i Komunës së Hanit të Elezit që ta kthej ligjshmërinë në këtë proces, ta anuloj vendimin Nr. 2152/2022 të datës 23.03.2022 dhe avancimi për këtë pozitë të udhëhiqet në përputhje me kërkesat ligjore duke u shpall konkurs i brendshëm dhe transparent në mënyrë që kjo pozitë të fitohet në bazë të meritokracisë.

INPO fton organet përgjegjëse që ta hetojnë këtë rast dhe të gjithë zyrtarët që kanë bërë lëshime procedurale dhe ligjore, t’i mbajë përgjegjës para ligjit.