INPO kërkon shkarkimin e Drejtorit të Urbanizmit dhe hetimin e rastit të falsifikimit të vendimit të Kuvendit të Komunës në Ferizaj

12/08/2015

Ferizaj, 12 Gusht 2015- Organizata INPO, ka ftuar Prokurorinë Themelore në Ferizaj që të filloj hetimet lidhur me dyshimin e bazuar për falsifikim të Vendimit 01.Nr.14 të Kuvendit për revidimin e Planit Rregullues për zonën e I-rë dhe VIII-të të qytetit të Ferizajt.

Në bazë të hulumtimeve të organizatës INPO, e cila e monitoron punën e Kuvendit të Komunës në Ferizaj, konsiderojmë se me këto veprime Ekzekutivi i Komunës së bashku me Kryesuesin e Kuvendit të Komunës së Ferizajt kanë konsumuar elemente të veprës penale- Falsifikimi i Dokumentit Zyrtar, i paraparë në nenin 398 i Kodit Penal të Kosovës dhe Keqpërdorimi i pozitës apo autoritetit zyrtar, i paraparë në nenin 422 të Kodit Penal të Kosovës.

INPO përmes kësaj komunikate dëshiron që t’a njoftoj edhe një herë opinion publik, se Kuvendi i Komunës së Ferizajt me propozim të Drejtorit të Drejtorisë së Urbanizmit z.Faik Grainca përmes Kryetarit të Komunës z.Muharrem Svarqa, kishte marr Vendim për inicimin e procesit të ndryshimit dhe plotësimit të planeve rregulluese me fokusim të veçantë të shqyrtimit të koeficientit të ndërtimit për zonën e I-rë dhe zonën e VIII-të në mënyrë të kundërligjshme, duke pasur parasysh se neni 17 pika 8 i Ligjit Nr.04/L-174 për Planifikim Hapësinor thotë se Komuna mund të shqyrtojë dhe sipas nevojës të ndryshojë Planin Rregullue
s çdo pesë (5) vite.Mirëpo, afati ligjor për revidimin e këtyre zonave nuk ishte përmbushur pasi procesi për revidimin Planit Rregullues për  zonën e I-rë  do të mund të fillonte në muajin Gusht 2016 ndërsa për zonën VIII-të në muajin Mars 2017. Tutje, me 23 Shkurt 2015, anëtarët e Kuvendit të Komunës morën vendim për Revidimin e Planit Rregullues për zonën e I-rë dhe VIII-të , të cilin komisioni i përbashkët MMPH-MAPL, i cili është  i obliguar për vlerësimin e ligjshëmrisë së akteve komunale që kanë të bëjnë me planifikim hapësinor, e vlerësoi si të paligjshëm pasi preambula e këtij Vendimi nuk ishte e bazuar në ligjet dhe aktet e tjera ligjore që janë në fuqi në Republikën e Kosovës. Pas këtij konstatimi të komisionit të përbashkët të MMPH/MAPL, Kryesuesi i Kuvendit z.Faruk Guri, i përcjellë Ministrisë së Administrimit dhe Pushtetit Lokal MAPL, për rivlerësim Vendimin e dytë me 01.Nr.71, me preambulë të përmirësuar dhe ndryshim të dispozitivit të parë fare pa u konsultuar me Kuvendin e Komunës dhe rrjedhimisht pa e votuar një vendim të tillë.

Andaj, duke u bazuar në rrjedhën e procesit të revidimit, INPO vlerëson se këto veprime janë goditje e rëndë e demokracisë funksionale në nivelin komunal, me ç’rast falsifikohet vendimi i Kuvendit të Komunës si organi më i lartë vendimmarrës në qeverisjen lokale nga ana e Ekzekutivit të Komunës me anë të keqpërdorimit të pozitës apo autoritetit zyrtar.

Në këtë drejtim, INPO kërkon nga Kryetari i Komunës së Ferizajt, z.Svarqa  që ta shkarkoj nga pozita drejtorin e Drejtorisë së Urbanizmit dhe Mjedisit në Ferizaj, pasi është përgjegjës për fillimin e jashtëligjshëm të procesit të revidimit dhe paftësisë së tij që të hartoj akte sipas terminologjisë përkatëse ligjore kështu duke i vënë në lajthitje edhe anëtarët e Kuvendit. Gjithashtu, INPO i bën thirrje edhe anëtarëve të Kuvendit të Komunës që të jenë koshient karshi propozim-vendimeve me tematika të ndryshme të interesit qytetarë dhe të kenë kujdes kur ngrisin dorën dhe votojnë për akte të ndryshme të cilat nuk janë të hartuara në përkitazi me rregullativat ligjore.

INPO në misionin e saj ka pasur dhe do të ketë gjithmonë respektimin e marrëdhënieve të vendosura në mbrojtjen e demokracisë funksionale dhe shtetit të së drejtës dhe sigurisht mbi të gjitha mbrojtjen e interesit qytetarë duke e denoncuar publikisht çdo fenomen apo veprimtari që bie ndesh me interesat e tyre të ligjshme. Duke qenë të bindur në luftën ndaj këtyre fenomeneve, ne çmojmë se veprime të tilla si ato të zyrtarëve komunal, dëmtojnë rëndë demokracinë në vend, si dhe marrëdhëniet juridike të vendosura për mbrojtjen dhe mirëfunskionimin e shtetit ligjor dhe të së drejtës në Kosovë. Prandaj, është detyrë e parë e organeve dhe agjencive të ligjit, që të garantojnë zbatueshmërinë e ligjeve dhe ofrimin e shërbimeve cilësore nga zyrtarët e zgjedhur dhe të emëruar në institucionet publike të Republikës së Kosovës për qytetarët e këtij vendi, duke reaguar në mënyrë të shpejtë dhe efikase ndaj çdo shkelësi të rendit juridik duke ju bërë të qartë se shkelja e ligjeve në vend dënohet, madje dënohet në mënyrë të shpejtë dhe efikase.