Hulumtimi i opinionit publik të fshatrave të Ferizajt

12/09/2012

Ferizaj,12.09.2012. Ky hulumtim paraqet të dhënat e opinionit publik të katër fshatrave të komunës së Ferizajt për funksionimin e qeverisjes së tyre lokale dhe reflekton mendimet e qytetarëve të këtyre zonave për punën e komunës në përgjithësi dhe zyrtarëve komunal. Hulumtimi përfshinë popullatën e fshatrave: Greme, Nerodime, Pleshinë e epërme dhe Koshare, prej moshës 18 vjeqare dhe më tutje. Shtytja për hartimin e këtij hulumtimi rrjedh nga përpjekjet e INPO-s që t’i kontribuoj rritjes së pjesëmarrjes së qytetarëve në vendimmarrje dhe iniciativës për komuna llogaridhënëse, që marrin parasysh mendimin e qytetarëve dhe zbatojnë modelin e politikës nga ‘poshtë-lartë’.

Komuna e Ferizajt ka gjithsej 45 fshatra, por në pamundësi për të hulumtuar opinionin e qytetarëve të të gjitha fshatrave, në këtë hulumtim parimisht kemi proceduar me dy mënyra të kampionimit(mostrës). Mënyra e parë, kampionimi rastësor i thjeshtë, ku çdo fshat ka pasur mundësi të barabartë që të përzgjedhet për t’i realizuar anketat. Konkretisht kemi shënuar në fletë të veqanta emrat e 45 fshatrave të Ferizajt që përbëjnë edhe objektin e studimit. Letrat me emrat e fshatrave janë hedhur në një kuti, janë përzier dhe janë përzgjedhur rastësisht 4 fshatra, Gremja, Neordimja, Pleshina dhe Kosharja.

Hulumtimi argumenton se kënaqshmëria e qytetarëve të këtyre zonave të Ferizajt me funksionimin e qeverisjes së tyre lokale është mjaftë e ulët. Për më tepër rezultatet e hulumtimit flasin për një apati politike, ndryshe bojkot të publikut ndaj veprimtarisë së komunës. Më shumë se 50% e të anketuarve nuk informohen dhe nuk interesohen për veprimtarinë e komunës, kurse të dhënat kanë theksuar nivel të lartë pasiviteti përsa i përket angazhimit qytetar të të anketuarve, kur më tepër se 80% prej tyre nuk kanë marrë pjesë asnjëher në dëgjimet publike që i ka organizuar komuna e Ferizajt.

Hulumtimi gjithashtu konfirmon se qytetarët shfaqin plogështi për të komunikuar me institucionet komunale. Edhe pse INPO edhe në publikimet e më hershme ka tërhequr vërejtjen lidhur me mos-përfshirjen e qytetarëve në vendimmarrje, si duket qeverisja lokale në Ferizaj nuk po e gjen dot zgjidhjen për tejkalimin e këtij problemi. Ky fakt paraqet një defekt serioz për një qeverisje që mbështetet në parimet e qeverisjes së mirë dhe që synon përmbushjen e objektivave siq janë rritja e pjesëmarrjes së qytetarëve në vendimmarrje.

Sipas të dhënave të mbledhura, pjesa më e madhe e të anketuarve janë treguar të kënaqur me shërbimet që i’u ofron administrata komunale, 62% e të anketuarve kanë qenë mesatarisht të kënaqur me shërbimet e administratës komunale. Shumica e të anketuarve kanë qenë të pa punë dhe si duket ky variabël ka pasur impakt të drejtëpërdrejt edhe tek përceptimi i qytetarëve për korrupsionin, ku 42% e të anketuarve mendojnë se zyrtarët komunal janë të korruptuar. Gjithashtu pjesa më e madhe e të anketuarve ka qenë me shkollim të mesëm dhe pas testimit të marrdhënieve (koeficienti Pearson) mes variablit të nivelit të shkollimit dhe pyetjes se a mund të ndikojnë qytetarët në agjendën politike të komunës, ne kemi arritur në përfundim se niveli i arsimimit ka ndikuar në përgjigjiet e qytetarëve dhe rreth 55% e të anketuarve kanë shprehur bindjen se qytetarët nuk mund të ndikojnë në agjendën e komunës.

Në mënyrë që të ofrojmë një pasqyrë sa më reale të opinionit publik, kemi trajtuar në mënyrë të drejtë dhe të paanshme problemin e hulumtimit, kemi bërë analizë objektive të të dhënave të mbledhura dhe kemi sugjeruar disa rekomandime për përmirësimin e gjendjes. Pwr tu tejkaluar kjo gjendje, INPO ka përmbledhur disa rekomandime:
• Në mënyrë që të rritet interesimi i qytetarëve për çështjet publike, politika më e mirë që komuna e Ferizajt mund ta ndjek është që të bëjë përpjekje që të zhvilloj mentalitetin tek qytetarët se funksioni i komunës është që ti shërbej qytetarët.
• Të inkurajohen qytetarët që t’i përdorin mekanizmat e kontrollit, në mënyrë që të besimi i tyre për punët e komunës dhe të minimizohet përceptimi për korrupsionin.
• Të krijohen mekanizma funksional për marrjen e informatave kthyese nga qytetarët.
• Veprimtaria e komunës të jetë sa më transparente dhe e përgjegjshme. Këto dy parime janë themeli i ndërtimit të besimit në institucione. Konkretisht trajtimi me kohë dhe kualitativ i qytetarëve, bashkë me procedura jo të komplikuara, ka shumë ndikim tek përceptimi i qytetarëve për punën e institucioneve komunale.

Kufizimet e këtij hulumtimi janë: Mungesa e statistikave të sakta të numrit të popullësisë që jeton nëpër fshatrat e komunës së Ferizajt, që ndikon drejtëpërdrejtë në mostrën e hulumtimit, si dhe shtrirja e hulumtimit nëpër të gjitha fshatrat e komunës së Ferizajt. Në bazë të llogaritjeve të bëra në DSS Research, margjina e gabimit e kësaj mostre është +/- 4%.