Ekskursionet e Dështuara

11/10/2012

Ferizaj, 11 Tetor 2012. Iniciativa për Progres ka përcjellur me vëmendje organizimet e ekskursioneve që po i bëjnë shkollat e mesme të Kosovës në udhëtime pesëditore në Shqipëri. Përveq problemeve të mëdha që janë ngritur nga mediat lidhur me fitimin e tenderëve për dërgimin e maturantëve në Shqipëri dhe ankesat e shumta të kompanive turistike se tenderët kanë qenë të manipuluar, se ka pasur marrëveshje nën tavolinë dhe se në përzgjedhjen e kompanive fituese ka pasur raste edhe kur kanë intervenuar kryetarët e komunave, INPO ka vërejtur se këto nuk janë keqpërdorimet e vetme.

Për INPO-n në rend të parë është mjaftë shqetësuese mënyra se si po organizohen këto ekskursione. Ky organizim është treguar dhe po tregohet një praktik jo e suksesshme, e cila ka koston e vet për prindërit dhe qysh në fillim ka filluar me telashe dhe me mungesë të organizimit të mirëfilltë. Për më tepër rasti i fundit në komunën e Ferizajt, ku një nxënëses nga Gjimnazi i Shkencave shoqërore, i është hedhur substancë e panjohur në pije e cila e ka alivanosur për disa minuta dëshmoi edhe një herë se ky lloj organizimi i ekskursioneve përveq se po bëhet pa kurrfar planifikimi, bart edhe rreziqe pasi që nxënësit nuk janë aspak të sigurt.

Kjo mënyrë e organizimit të ekskursioneve, ku nxënësit mund të konsumojnë pije alkoolike dhe nuk kontrollohen prej askujt, ku askush nuk mbikëqyr sjelljet e tyre, madje ka raste kur edhe sulmojnë kolegët e tyre fizikisht vërteton se ky lloj ekskursioni nuk i’u sjell asnjë të mirë nxënësve dhe vetëm i dëmton ata, njëherit po e dëmton rëndë edhe imazhin e institucioneve edukative-arsimore të Kosovës, që duke lejuar organizime të këtij niveli të degradojnë edhe misionin e tyre për promovimin e arsimit cilësor në Republikën e Kosovës. Ky shëndrrim i ekskursionit në cirk pa ndonjë përmbajtje edukative, me shërbime jo të mira ndaj maturantëve, që nuk korrespondojn me pagesat që ata i bëjnë, tregon se i tërë ky proces po ndodh vetëm me qëllim të përfitimit të individëve të caktuar.

INPO përmes kësaj komunikate i përkujton Ministrisë së Arsimit, Shkencës dhe Teknologjisë dhe Drejtorive të Arsimit nëpër komunat e Kosovës, se me lejimin e organizimit të këtyre ekskursioneve për qëllime të përfitimit, nuk po i kontribuojnë aspak zhvillimit të arsimit në Kosovë. Dhe duke parë këtë gjendje INPO kërkon nga të gjitha institucionet përgjegjëse që të ushtrojnë obligimet dhe kompetencat e tyre ligjore, nëse jo për anulimin e këtyre ekskursioneve në të ardhmen, të paktën të bëhet planifikimi i mirëfilltë i tyre dhe këto ekskursione të përmbushin qëllimin e tyre të synuar, të përmbajnë elemente edukative dhe arsimore.