“Ecuria financiare e komunës së Ferizajt Janar-Mars 2015 dhe gjendja e projekteve kapitale”

19/05/2015

Ferizaj, 29 Maj 2015- INPO të enjten, ka mbajtur tryezën “Ecuria financiare e Komunës së Ferizajt Janar-Mars 2015 dhe gjendja e projekteve kapitale”, të cilën e organizoi për të diskutuar rreth shpenzimeve të cilat komuna i ka realizuar gjatë kësaj periudhe duke vënë në fokus investimin në projektet kapitale, si dhe inkasimin e të hyrave vetanake gjatë këtij tre mujori.

Drejtori ekzekutiv i INPO-s, z.Alban Haliti ka prezantuar një analizë të shkurtër të raportit të ecurisë financiare të komunës së Ferizajt, për periudhën tre mujore Janar-Mars 2015. Ai tha se ky raport financiar është i mangët dhe jo mirë i paraqitur. “Kemi hasur shumë parregullsi teknike dhe paqartësi të mjeteve se nga janë destinuar. Nuk janë specifikuar saktësisht se për çka është shfrytëtuar donacioni i participuar nga qytetarët në vlerë prej 44,016.00 € që raportohet si shpenzim”, tha z.Haliti. Tutje ai prezantoi se komuna ka miratuar buxhetin në vlerë totale 25,148,781.00 €,kurse deri tani janë shpenzuar 5,238,167.81€. Buxhetin e shpenzuar për këtë periudhë raportuese më së shumti e kanë konsumuar shpenzimet rrjedhëse të komunës në vlerë prej 3,752,941.15 € ku përfshihen këto kategori : pagat dhe mëditjet, mallrat dhe shërbimet, komunalit, subvencionet dhe transferet ,ndërsa kategoria e investimeve kapitale ka mbetur e pashfrytëzuar mirë duke u pasqyruar në raport me vlerën e shpenzimeve për këtë kategori prej 1,396,054.02 €. “Në disa drejtori nuk është shfrytëzuar buxheti fare, i cili është destinuar për investime kapitale dhe ky është një indikacion negativ, i cili nuk premton zhvillim ekonomik të komunës.Drejtoria e Zhvillimit Ekonomik ka një buxhet të miratuar në vlerë prej 230,000.00 €, mirëpo ky buxhet deri në momentin që po diskutojmë nuk ka filluar të ekzekutohet apo të shfrytëzohet. Gjithashtu, Drejtoria e Shëndetësisë ka një buxhet në vlerë prej 339,700.00€ dhe nuk kanë filluar investime edhe pse nevojat janë tepër të larta për komunitetin. E njëjta situatë paraqitet edhe te Drejtoria e Planifikimit Urban dhe Mjedis” tha z.Haliti. Gjithashtu, z.Haliti tha se projektet kapitale të cilat do të duhej të gjeneronin zhvillimin e mëtutjeshëm të komunës, e të cilat janë të paraqitura në listën e investimeve kapitale për vitin 2015, nuk janë të sinkronizuara me buxhetin e miratuar për vitin 2015 dhe strategjinë zhvillimore 2015-2017 të Korrrnizës Afatmesme Buxhetore.

z.Xhavit Zariqi nënkryetar i komunës së Ferizajt mirëpriti debatin e organizuar nga INPO. Ai tha se në secilin vit fiskal, tremujori i parë është më i dobëti sa i përket inkasimit dhe investimeve, për faktin së është fillimi i vitit dhe është periudhë kohore e papërshtatshme për investime kapitale. “Në dymujorin e parë është e pamundur të fillohet edhe me procedurat e prokurimit sepse sistemi i pagesave është i bllokuar dhe tek në muajin e tretë komuna fillon të punojë në këtë drejtim”. Ndërsa, lidhur me diskrepancën dhe mos sinkronizimin e buxhetit me dokumetet strategjike të komunës, z. Zariqi tha është e pamundur dhe komuna nuk e ka asnjë mundësi të vetme që të ndjekë projkesionet e këtyre dokumenteve strategjike dhe t`i zbatojë ato. “ Strategjia Zhvillimore për vitin 2015-2017 e Kornizës Afatmesme Buxhetore, është një strategji e cila kurrë nuk do të mund të zbatohet as 50%, për shkak se kjo strategji synon ambicie dhe arritje të mëdha brenda 3 viteve por që në realitet janë të paarritshme dhe mbesin vetëm në një dokument në sirtarë të komunës”.

Ndërsa, Medain Hashani, anëtarë i Kuvendit të Komunës nga radhët e Partisë Demokratike të Kosovës, tha se raporti 3 mujor ka mospërputhje të vlerave të shpenzuara dhe të mbetura dhe në këtë formë ky raport nuk mund të cilësohet serioz dhe i pranueshëm. Komuna për të përmirësuar performancën e shpenzimeve dhe hartimin e raporteve financiare të sakta dhe të pranueshme duhet të krijoj një sistem informativ të kontabilitetit. Ai gjithashtu tha se ekzekutivi i komunës shpesh herë ka bërë shkelje procedurale duke tejkaluar kompetencat e veta sa përket çështjeve të financave të komunës. “Kryetari i Komunës, me vendim të tij, ka bërë bartjen e mjeteve nga investimet kapitale në kategorinë për mallra dhe shërbime, fare pa e konsultuar Kuvendin Komunal, dhe ky është një veprim antiligjor me të cilin do të duhej të merreshin institucionet e drejtësisë” tha z.Hashani.

Pjesëmarrës të tjerë në këtë tryezë të cilët dhanë kontributin e tyre në diskutime, ishin edhe anëtarë të tjerë të Kuvendit të Komunës nga partitë opozitare, përfaqësues të shoqërisë civile dhe mediat.