Analiza krahasuese e INPO-s për kompenzimin e anëtarëve të Kuvendit Komunal dhe Kuvendit të Kosovës

29/11/2011

“Përfaqësuesit e qytetarëve në nivelin komunal trajtohen si shumë më inferior se ata në nivelin qëndror”

Prishtinë, 29 Nëntor 2011 – Iniciativa për progres (INPO) ka realizuar një analizë lidhur me përfitimet materiale dhe benefitet tjera të cilat i kanë anëtarët e Kuvendeve Komunale në krahasim me anëtarët e Kuvendit të Kosovës. Analiza tregoi se përfaqësuesit e qytetarëve në nivelin komunal trajtohen si shumë më inferior se ata në nivelin qëndror në lidhje me benefitet për punën të cilën e bëjnë. Ky diskriminim ka dy anë: numrin e përfitimeve për funksionin të cilin e ushtrojnë dhe nivelin e kompenzimit. Këto dy pozita mund të krahasohen në mënyrë analoge për arsye se që të dy pozitat janë poste ku anëtarët përfaqësojnë qytetarët dhe që zgjidhen drejt-përdrejtë nga ta. Për më tepër, nivelit komunal me adoptimin e Ligjit për Vetëqeverisje Lokale (Ligji nr. 03/L-040) i janë dhënë kompetenca të mëdha duke e bërë atë përgjegjës për zhvillimin ekonomik lokal, shëndetësinë, arsimin, infrastrukturën në komunë dhe shumë fusha tjera me rëndësi. Për ushtrim efikas të këtyre përgjegjësive dhe për mirëfunksionimin e Komunës me rëndësi të jashtëzakonshme është edhe Kuvendi i Komunës.

Të gjeturat e analizës janë shqetësuese, kjo pasi të ardhurat e anëtarëve të Kuvendit të Kosovës janë shumë herë më të larta se ato të anëtarëve të Kuvendit Komunal. Këto diferenca e bëjnë pozitën e përfaqësuesit në nivel lokal shumë më inferior se atë të nivelit qëndror. Kështu, paga e deputetit të Kuvendit të Kosovës është rreth 1500 euro, apo thënë më ndryshe 15 herë më e lartë se kompenzimi bazë i anëtarit të Kuvendit Komunal (100 euro). Për pjesmarrje në seanca të Kuvendeve respektive, anëtarët e Kuvendit të Kosovës paguhen 240 euro, përderisa anëtarët e Kuvendit Komunal 125 euro. Sipas një aritmetike të thjeshtë vetëm kompenzimi për pjesmarrje në mbledhje të Kuvendit të Kosovës është më i lartë se të gjitha të hyrat së bashku të anëtarit të Kuvendit Komunal. Në anën tjetër, për pjesmarrje në mbledhjet e komisioneve pranë Kuvendeve respktive, anëtarët e Kuvendit të Kosovës paguhen 160 euro në muaj, apo 3 herë më shumë se pjesmarrësit në komisione në nivel lokal.

Edhe kompenzimet për ushtrimin e funksioneve analoge (kryetarët dhe nënkryetarët e Kuvendeve, kryetarët e komisioneve) kanë diferenca shumë të mëdha në favor të Kuvendit të Kosovës.

Për më tepër në bazë të Ligjit për të Drejtat dhe Përgjegjësitë e Deputetit (Ligji numër 03/L-111) deputetëve të Kosovës u garantohen edhe një sërë benefitesh tjera shtesë, duke përfshirë: pagën kalimtare pas përfundimit të mandatit, kompenzimin e shpenzimeve mujore, pensionin suplementar (momentalisht ky nen është suspenduar nga Gjykata Kushtetuese e Kosovës), dhe kompenzimin për shpenzimet e udhëtimit. Në rastin anëtarëve të Asamblesë Komunale asnjëra prej këtyre benefiteve nuk u njihet atyre.

INPO vlerëson se ky është vetëm një indikator i faktit se qeverisjes lokale nuk i është kushtuar vëmendje dhe nuk i janë alokuar resurset e nevojshme në raport me përgjegjësitë të cilat u janë dhënë. INPO u bënë thirrje institucioneve përgjegjëse që të trajtojnë këtë situatë nën parimin e trajtimit të barabartë dhe të dinjitetshëm të institutcioneve.