39 do të jetë numri i nxënësve në paralele këtë vit

05/07/2011

Përfaqësues të organizatës INPO, sot u takuan me Drejtorin e Drejtorisë për Arsim në Komunën e Ferizajt, z. Agim Berisha, me ç’rast u diskutua për gjendjen në arsim në komunën e Ferizajt, me fokus rezultatet e testit të maturës shtetërore dhe pranimi i semi-maturantëve në vitin e ardhshëm shkollor.
Drejtori Berisha, prezantoi punën e bërë gjatë këtij viti duke i renditur ato si vijon:

1. Përfundimi i vitit shkollor me sukses,
2. Ndalimi i konsumimit të duhanit dhe çajit në ambientet e shkollave të komunës së Ferizajt,
3. Zgjatja e orës mësimore nga 40 min. në 45 min., pos në dy shkolla ku ende mësimi mbahet në 3 ndërrime
4. Vendosja e kamerave nëpër shkollat e komunës së Ferizajt në bashkëpunim me Fiq dhe Saferworld
5. Kontroll i shtuar i shkollave dhe verifikimi i diplomave të mësimdhënësve dhe,
6. Përpilimi i kritereve për pranim në shkollat e mesme te semi-maturantëve.

Diskutimi më vonë u fokusua në rezultatet e maturantëve, gjatë testit të maturës. INPO shprehu keqardhje për një rezultat aspak të mirë në shkollat profesionale si dhe në gjimnazin e shkencave shoqërore, duke theksuar se ndoshta mungesa e vëmendjes për këto shkolla po bënë, që rezultatet e tyre te jenë minore. Drejtori Berisha tha se këto rezultate kanë edhe shkaktarët e tyre, që sipas tij janë mospërmbushja e drejtë dhe e plotë e plan programit mësimorë nga mësimdhënësit, të cilës i shtohet edhe dukuria e mos mbajtjes së orëve të fundit nëpër të gjitha shkollat, edhe në nivel nacional.

Aktivistët e INPO-së i prezantuan drejtorit, ide për bashkëpunim, i cili do të fokusohej së pari në dy pika:
Pika e parë ishte sensibilizimi i prindërve dhe i nxënësve të shkollave fillore, për profilet e shkollave profesionale. Kjo ide do të ndihmonte nxënësit të njiheshin më shumë me shkollat profesionale, por gjithashtu ndihmon edhe shkollat që të tërheqin sa më shumë nxënës të mirë, në mënyrë që të rritet edhe rezultati në testet e maturës por që gjithashtu qyteti të fitonte kuadro profesionale në drejtimet deficitare.

Pika e dytë është monitorimi i gjithë procesit të pranimit të nxënësve në shkollat e mesme të Komunës së Ferizajt. Z. Berisha tha se INPO mund ti vizitoj komisionet vlerësuese gjatë punës së tyre por jo edhe të jetë e pranishme gjatë tërë kohës së vlerësimit të nxënësve. Drejtori Berisha tha se numri maksimal i nxënësve nëpër paralele, të cilët do te pranohen këtë vit nuk do të kalojë shifrën prej 39 nxënësve, dhe se nuk do të këtë mundësi që të bëhen keqpërdorime në përzgjedhje sepse numërimi i pikëve do të bëhet në mënyrë kompjuterike dhe se kriteret për pranim do jenë të larta, ku nuk do të këtë hapësirë për degradim të procesit.

Ky ishte fillimi i takimeve të INPO-së me zyrtarët komunalë si formë e re e komunikimit për zgjidhjen e problemeve dhe preokupimeve të qytetarit duke ofruar bashkëpunim dhe alternativa të reja.

Rekomandimet e INPO-së,
Inspektim më i shtuar në objektet shkollore
Ngritje të kapaciteteve dhe aftësim profesional të kuadrove
Vendosjen dhe respektimin kritereve për pranim në shkolla të mesme
Promovimin e shkollave të mesme profesionale