Vëzhgimi i raundit të dytë të zgjedhjeve në komunën e Ferizajt

25/05/2012

Ferizaj, 25 maj 2012 — D4D dhe INPO kanë vazhduar me monitorimin e fushatës parazgjedhore të dy kandidatëve që nga zgjedhjet e jashtëzakonshme të 29 prillit 2012 shkuan në balotazh për të parin e kësaj komune.
D4D dhe INPO kanë monitoruar fushatën parazgjedhore për kryetar komune në Ferizaj nga data 23 maj deri në përmbylljen e fushatës më 25 maj 2012. Fushata parazgjedhore për raundin e dytë të zgjedhjeve në përgjithësi ka qenë e qetë dhe pa ndonjë incident serioz (në ora 15:00).
Aktivitetet më të shpeshta të partive politike gjatë fushatës kanë qenë tubimet. Pjesëmarrja e qytetarëve në këto tubime ka qenë e ulët, ku pjesa dërrmuese e pjesëmarrësve kanë qenë militantë partiakë të partive të cilat janë në garë. Mesatarisht rreth 100 pjesëmarrës kanë marrë pjesë në tubimet e organizuara nga partitë, prej të cilëve një numër i vogël i tyre kanë qenë femra dhe fëmijë.
Kandidatët kanë vazhduar me të njëjtat premtime sikurse në raundin e parë. Në këtë aspekt, kandidati i PDK-së Agim Aliu përpos premtimeve për përmirësimin e infrastrukturës, në vazhdimësi ka premtuar se do të vazhdojë rrugën e Bajrush Xhemailit dhe projektet e këtij të fundit. Ndërsa, kandidati i LDK-së Adem Salihaj përpos etiketimeve dhe dështimeve të PDK-së dhe kandidatit të saj, ka premtuar rregullimin e sheshit të qytetit dhe investime në fushat ku ka më së shumti nevojë, siç janë bujqësia, arsimi, etj.
Ndër parregullsitë, sikurse edhe në raundin e parë, është evidentuar përdorimi i veturave zyrtare gjatë fushatës, kryesisht nga PDK si dhe pjesëmarrja e zyrtarëve të qeverisë në këto tubime gjatë orarit të punës.
D4D dhe INPO do të vëzhgojë tërë procesin e votimit dhe të numërimit gjatë ditës së zgjedhjeve më 27 maj 2012 dhe do të raportojë për çdo parregullsi eventuale që do të evidentohet gjatë këtij procesi. D4D dhe INPO do të kenë nga një vëzhgues në secilin vendvotim si dhe ekipe mobile të cilat do të jenë në gjendje gatishmërie për të vizituar ato vendvotime ku mund të paraqiten parregullsi. Për më shumë informata gjatë ditës së zgjedhjeve mund të kontaktoni zyrtarët e INPO-s, z. Avni Bytyçi në 044 746 749 dhe të D4D-së, z. Valmir Ismaili në 044 194 738. Qendra mediale e monitoruesve të D4D-së dhe INPO-s do të jenë në zyrat e INPOs, të cilat gjenden në të njëjtin objekt me restaurantin ORCHIDE.