“Vetëvrasjet, plagë e shoqërisë”
10/06/2011INPO në bashkëpunim me Policinë e Kosovës organizoi tryezën me temë: “Vetëvrasjet, plagë e shoqërisë” në Ferizaj.
Në këtë debat morën pjesë: Policia e Kosovës, Sinavere Hoxha –psikologe , Gani Kashtanjeva – Enti për Punë Sociale në Ferizaj, përfaqësues nga Bashkësia Islame, përfaqësues nga Këshilli i Nxënësve të Ferizajt, profesorë, OJQ-të dhe mediet.
Fenomeni i vetëvrasjeve dhe tentativave për vetëvrasje është në rritje e sipër në mbarë vendin, u tha nga Izet Azizi Drejtor i Stacionit Rajonal të Policisë në Ferizaj. Kjo dukuri është mjaftë shqetësuese për shoqërinë tonë në përgjithësi. Gjatë 10 vjetëve të fundit, në komunën e Ferizajt janë evidentuar 56 raste të vetëvrasjeve dhe 147 tentativë për vetëvrasje. Në zonat urbane u tha se ka tendencë më të madhe për kryerjen e akteve të tilla dhe sipas të dhënave të Policisë, gjinia mashkullore radhitet e para për aktet e vetëvrasjeve, ndërsa gjinia femërore për tentim vetëvrasje.
Psikologia Sinavere Koxha tha se shkaqet të cilat i qojnë njerëzit të ndërmarrin veprime të tilla janë kryesisht të karakterit social siç janë: Kriza e identitetit(veçanërisht mosha rinore), konfliktet në familje, stresi, konfliktet ndër personale, problemet mentale, të abuzuarit me droga, alkool etj.
Gani Kashtanjeva nga Enti për pune sociale tha se, ky institucion ka pasur disa herë raste të tilla kryesisht të moshës rinore, të cilat i ka trajtuar me aq sa kanë pasur mundësi duke e potencuar se Enti për pune sociale nuk ka psikologë i cili do të trajtonte rastet e tilla dhe raste tjera sociale për të cilat nevojitet prania e psikologut.
Fokus të veçantë në debat ju kushtua gjetjes së mekanizmave funksional për parandalimin e kësaj dukurie, ku u potencua se institucionet publike nuk kanë ende një strategji funksionale për trajtimin e këtyre rasteve. Mos funksionimi i institucioneve përkatëse dhe mos shkëmbimi i informatave lidhur më këto raste janë probleme kyçe të cilat shkaktojnë mos sukses në parandalimin e (tentim) vetëvrasjeve.
Rekomandimet:
1. Hartimi i një strategjie për parandalimin vetëvrasjeve
2. Krijimi i një qendre preventive të vetëvrasjeve
3. Hapja e një qendre të thirrjeve për paraqitjen e këtyre rasteve
4. Mos raportimi në medie për vetëvrasjet
5. Trajnimi i mësuesve në fushën e psikologjisë së moshës së adoleshencës
6. Përcaktimi i detyrave të çdo pjesëtari të shoqërisë për ta parandaluar këtë fenomen