Siguria në shkollat e komunës së Ferizajt vazhdon të jetë në nivel shqetësues

19/11/2011

Iniciativa për Progres përmes një tryeze të rrumbullakët ka ri-aktualizuar sot çështjen e sigurisë në shkolla përmes temës “Siguria e nxënëseve në institucionet shkollore”, pas incidentit të ndodhur më 10 nëntor në shkollën e mesme ekonomike “Faik Konica”.
Në këtë tryeze morën pjesë Agim Berisha, Drejtor i Drejtorisë së Arsimit në Ferizaj, përfaqësues të Policisë së Kosovës, Prokurori Publik i Ferizajt, përfaqësues të EULEX-it, drejtor të shkollave të mesme, Këshilli i Nxënësve, Këshilltarë komunal, organizata joqeveritare dhe media.

“Mungesa e sigurisë së nxënësve në shkolla është një dukuri mjaft shqetësuese, andaj duhet të merren masa të nevojshme për parandalimin  e kësaj dukurie” u tha nga disa pjesëmarrës në këtë tryezë.
Në anën tjetër, për drejtorin e drejtorisë së Arsimit në Ferizaj, z. Agim Berisha, çështja e sigurisë nuk është në nivel të alarmimit, me arsyetimi se “kësi lloj incidentesh mund të ndodhin kudo”. Ai tha se janë marr disa masa për parandalimin e rrezikut nga dhuna në shkolla siç janë; rritja e kujdestarisë, uniforma dhe bexhat për nxënësit dhe vendosja e kamerave.

Përfaqësuesit e policisë në tryezë thanë se vetëm gjatë këtij viti kanë ndodhur 59 raste të llojeve të ndryshme të incidenteve nëpër shkolla.

Në këtë tryezë u  diskutua edhe për rrezikun e ndezjes së mbeturinave brenda oborrit të shkollës dhe  prezenca e veturave të paautorizuara brenda oborreve të shkollave, që po ashtu po i shqetëson nxënësit, mësimdhënësit dhe prindërit. Nga të pranishmit u tha që mungon përgjegjësia nga ana e drejtorëve për të cilët asnjëherë nuk janë shqiptuar masa ndëshkimore për parregullsitë në menaxhimin e shkollës.

Konkluzionet dhe rekomandimet;
Të hartohen rregulloret e brendshme të shkollave
Të bëhet sigurimi privat i shkollave
Funksionalizimi  këshillave që veprojnë brenda shkollës.
Instalimi i përgjegjësisë nga drejtorët për vet ata, për mësimdhënësit dhe për nxënësit.
Të kërkohet në përpikëri të zbatohen masat e ndërmarra.
Anketa me nxënës për çështjen e sigurisë.
Hartimi i strategjisë lokale për parandalimin e rrezikut në shkolla.