Qytetarët e kryeqytetit në hall nga mungesa e parkingjeve

07/06/2013

Prishtinë, 07 Qershor 2013 – Një nga problemet më të mëdha me të cilin qytetarët e Prishtinës po ballafaqohen çdo ditë është mungesa e parkingjeve. Ky problem është i pranishëm në kryeqytet për një kohë të gjatë, mirëpo ditëve të fundit rrugët dhe trotuaret e Prishtinës janë të stërngarkuara dhe po bllokohen gjithnjë e më shumë nga veturat. Më parë problemi më i madh ka qenë me qendrën e Prishtinës, mirëpo këto ditë edhe nëpër shumë lagje të Prishtinës qytetarët janë në hall nga mungesa e vende për të parkuar veturën.

Mungesa e parkingjeve po i detyron qytetarët që t’i parkojnë veturat e tyre edhe në vende të palejuara, ku shpesh ndodhë edhe t’iu konfiskohen veturat dhe të marrin gjoba nga ana e policisë së Kosovës. INPO konsideron se pa aftësia e komunës së Prishtinës që të gjejë zgjidhje për këtë problem, në mënyrë të padrejtë po iu kushton qindra euro qytetarëve të Prishtinës.

Nga ana tjetër komuna e Prishtinës për vite me radhë zotohet se këtë problem do ta zgjedh së shpejti, duke i ndërtuar tri parkingje nëntokësore në tri lokacione të ndryshme të qytetit. Mirëpo, ky propozim i komunës së Prishtinës mbetet i dëshiruar, por që ende nuk po mund të realizohet.

INPO vlerëson se arsyetimet e zyrtarëve komunal, se problemet me mungesën e parkingjeve po ndodhin, ngase Prishtina është qyteti më i populluar në Kosovë dhe se gjatë ditës në Prishtinë hyjnë shumë vetura nga të gjitha pjesët e tjera të Kosovës, nuk janë të qëndrueshme.

Prandaj, duke pasur parasysh edhe mungesën e mjeteve buxhetore të komunës së Prishtinës INPO rekomandon që problemi i parkingjeve në kryeqytet të zgjidhet përmes funksionalizimit të partneritetit publiko-privat.