Prokurimi Publik në nivel Lokal– Problemet dhe sfidat e funksionimit të zyrave të prokurimit.

25/05/2011

INPO sot, gjatë një konference për shtyp publikoi raportin “Prokurimi Publik në nivel Lokal– Problemet dhe sfidat e funksionimit të zyrave të prokurimit të komunave të Ferizajt, Kaçanikut dhe Shtimes”.
Me qëllim të adresimit të problemeve në sektorin e prokurimit në Komunën e Ferizajt, të Shtimes
dhe të Kaçanikut, nga muaji Tetor 2010, INPO ka filluar të zbatojë projektin “Për Prokurim Transparent dhe të Paanshëm” të mbështetur nga Balkan Trust for Democracy, i cili për qëllim ka studimin e efikasitetit, paanshmërisë dhe transparencës në kontraktimin e punëve dhe shërbimeve të ndryshme nga ana e Komunave të Ferizajt, Shtimes dhe Kaçanikut.

Sfida e fillim vitit për të tri komunat ka qenë Buxheti i Kosovës i cili është aprovuar me 31 mars që ka shkaktuar vonesa në realizimin e procedurave tenderuese për zyrat e prokurimit. Kjo vonesë do të paraqet problem në realizimin e punëve për investime kapitale. Gjithashtu pengon realizimin e planit të prokurimit të këtyre komunave për vitin 2011.

Gjatë monitorimit tonë për periudhën shtatë mujore ( tetor 2010 -prill 2011) për të tri komunat kemi vërejtur këto parregullsi:

– Mos respektimi i kohëzgjatjes së kontratës gjithashtu është një emërues i përbashkët i të tri komunave. Vonesat në realizim të kontratës dhe mosndëshkimi i operatorit ekonomik të shkaktuara janë dominuese në sektorin e prokurimit.

-Pikë e dobët e ZP-ve janë edhe kriteret e vlerësimit, që do të thotë se vlerësimin e ndonjë oferte duhet ta bëjnë njohësit e asaj fushe. Më tutje, mbledhjet e Komisionit vlerësuese janë të mbyllura për publikun. Ndonëse Zyra e Prokurimit është menaxhon kontratat publike, faji për shumë probleme nuk është vetëm tek kjo zyre por lidhet edhe me udhëheqësin e lartë të Ekzekutivit dhe Kuvendit Komunal.

-Mungon praktika e mbikëqyrjes kualitative të progresit të zhvillimit të punëve e veçanërisht procedura e pranimit teknik pas përfundimit të punëve. Komisionet mbikëqyrëse të një kontrate janë jo serioze në shumicën e rasteve ata as nuk dalin ti mbikëqyrin punët.