Pas rekomandimit të INPO-s, Komuna e Vitisë largon kërkesat shumë të larta, jo proporcionale dhe diskriminuese të vendosura në Dosje të Tenderit

13/06/2022

Prishtinë, 13 qershor 2022 – Në kuadër të monitorimit sistematik të prokurimit publik, INPO është duke monitoruar edhe aktivitetin e prokurimit të titulluar “Rregullimi i rrugëve bujqësore me zhavorr”, me numër të prokurimit 657-22-5287-5-2-1 dhe vlerë të parashikuar 310,000 euro, të udhëhequr nga Komuna e Vitisë.

Gjatë monitorimit, INPO ka gjetur se Komuna e Vitisë ka vendosur kërkesa shumë të larta dhe jo proporcionale lidhur me mundësitë teknike dhe/ose profesionale. Konkretisht bëhet fjalë për kërkesën 2, ku është kërkuar: “Stafi i të punësuarve, minimum 20 punëtorë. Menaxheri i projektit të jetë inxh. i diplomuar i ndërtimtarisë- drejtimi konstruktiv ( ose master) me minimum, 5 vite përvojë; Një (1) inxh. dipl. hidroteknik (ose master) me minimum, 5 vite përvojë; Një (1) inxh.dipl. i gjeodezisë (ose master) i licencuar nga AKK; Dy (2) bachelor të gjeodezisë të licencuar nga AKK.  me minimum, 5 vite pervojë; Dy(2) Bsc të ndërtimtarisë- konstruktiv me se paku 3 vite përvojë pune në realizimin e projekteve të ngjashme. Një (1) master  ose Bsc.i. komunikacionit   me se paku 5 vite përvojë pune në realizimin e projekteve të ngjashme, Punëtorë për siguri dhe  mbrojtje në punë 10, dhe 10 punëtorë për mbrojtje nga zjarri të kenë dëshmi certifikatën”. Kërkesat e larta dhe jo proporcionale me natyrën e prokurimit janë të ndaluara me nenin 69, paragrafi 1 të Ligjit për Prokurimin Publik, lidhur me nenin 26 të Rregullave dhe Udhëzuesit Operativ për Prokurimin Publik.

Më 09.06.2022, nëpërmjet një reagimi të brendshëm, INPO kishte kërkuar nga Komuna e Vitisë që nëpërmjet formularit standard B54 – Formulari për korrigjimin e gabimeve në njoftimet e publikuara, t’i ulë kërkesat sa i përket numrit të inxhinierëve përfshirë edhe përvojën e tyre të punës dhe të kufizohet vetëm në inxhinier të cilët janë të lidhur ngushtë për natyrën e aktivitetit të prokurimit. Gjithashtu, të ulet për nga numri i punëtorëve edhe kërkesa “Punëtorë për siguri dhe  mbrojtje në punë 10, dhe 10 punëtorë për mbrojtje nga zjarri të kenë dëshmi certifikatën”.

Pas reagimit të INPO-s, Komuna e Vitisë i ka ulur këto kërkesa në vetëm menaxherin dhe katër (4) inxhinier, ku menaxheri dhe tre (3) inxhinier duhet të kenë së paku tre (3) vite përvojë pune, ndërsa kërkesa për “Punëtorë për siguri dhe  mbrojtje në punë 10, dhe 10 punëtorë për mbrojtje nga zjarri të kenë dëshmi certifikatën”, është ulur në “Punëtorë për siguri dhe  mbrojtje në punë 5, dhe 5 punëtorë për mbrojtje nga zjarri të kenë dëshmi certifikatën”.

Shih fotografinë nga Formulari B54 Formulari për korrigjimin e gabimeve në njoftimet e publikuara.

INPO përshëndet këtë adresim të menjëhershëm të rekomandimeve dhe kërkon nga Komuna e Vitisë që në ardhmen të sigurohet se në dosje të tenderëve nuk vendosen kërkesa shumë të larta, jo proporcionale dhe diskriminuese, por që kërkesat e vendosura të jenë deri në masën sa për autoritetin kontraktues sigurojnë menaxhim dhe cilësi të duhur.

INPO do të vazhdoj ta monitoroj prokurimin publik në gjithë Republikën e Kosovës.