Niveli i lartë i krimit në Prishtinë, fenomen shqetësues

04/06/2012

Prishtinë, 04 Qershor 2012- INPO ka analizuar hollësisht statistikat të cilat ka marrë nga Policia e Kosovës mbi gjendjen e sigurisë në komunën e Prishtinës. Të dhënat janë shqetësuese dhe flasin për numër të shtuar të aksidenteve, përleshjeve dhe lëndimeve të rënda duke mos lenë anash edhe dhunimet. INPO shpreh shqetësimin e thellë për nivelin e ulët të sigurisë në qytetin e Prishtinës. Të dhënat të cilat i posedon INPO janë marrë nga Stacioni Policor i Kosovës nga tri qendrat policore të vendosura në Prishtinë, atë nga stacioni policor – Qendra, jugu – Dardani, si dhe veriu – Kodra e Trimave. Të dhënat përfshijnë periudhën kohore nga viti 2011 deri në katër mujorin e parë të vitit 2012. Të dhënat dhe statistikat shqetësuese kanë të bëjnë me kryerjen e disa krimeve të cilat janë duke ndodhur në qytetin e Prishtinës, ku përfshihen vjedhjet, lëndimet trupore, përleshjet apo grabitjet me përdorimin e dhunës dhe aksidente trafiku.

Ky hulumtim është bazuar në gjashtë fushat e sigurisë: aksidentet e trafikut, përleshjet vjedhje dhe vjedhje të rënda, vjedhje të veturave, si dhe dhunime, ndërkaq shifrat që kanë dalë nga ky hulumtim tregojnë një numër të madh të aksidenteve të ndryshme që dëshmojnë nivelin e ulët të sigurisë në qytetin e Prishtinës.Më poshtë janë paraqitur shifrat në total të gjendjes së sigurisë të të gjitha fushave, ku aksidente të trafikut gjithsej janë 6,675 raste, prej tyre vetëm në vitin 2011 janë shënuar 5,124 raste, ku me lëndime janë 339 raste, ndërsa 4,785 raste tjera vetëm me dëme, krahasuar me vitin 2011, katër mujori i parë i vitit 2012 është shqetësues për shkak të numrit të madh të aksidenteve gjithsej 1,551, prej tyre 80 janë raste me lëndime, ndërsa 1,471 raste tjera vetëm më dëme. Sa i përket përleshjeve gjithsej janë 567 raste, prej tyre 429 raste të shënuara në vitin 2011, ndërsa në katër mujorin e parë të vitit 2012 janë 138 raste.

Fusha e tretë e hulumtimit ka të bëj me rastet e vjedhjeve dhe vjedhjeve të rënda, ku edhe në këtë fushë shifrat lënë shumë për tu dëshiruar sepse numri i rasteve është bukur i madh me 5,097 raste të vjedhjeve. Nga ky numër 4,034 janë shënuar vetëm në vitin 2011, raste të vjedhjeve janë 2,232, ndërsa vjedhje të rënda 1,802 raste, krahasuar me katër mujorin e parë të vitit 2012 numri i rasteve shënon trend të njëjtë, ku vetëm në këtë pjesë të vitit janë shënuar 1,063 raste në tërësi, prej tyre 457 raste janë me vjedhje, ndërsa 606 raste tjera me vjedhje të rënda.

Po ashtu edhe rastet e vjedhjeve të veturave si dhe dhunimeve, shifrat e shënuara për gjatë viteve janë të larta dhe janë tregues i gjendjes reale të sigurisë në qytetin e Prishtinës. Rastet sa i përket vjedhjes së veturave janë gjithsej 175, ku prej tyre 153 raste janë shënuar në vitin 2011, ndërsa në katër mujorin e parë të vitit 2012 rastet e shënuara të vjedhjes së veturave kapin shifrën e 22 rasteve. Ndërsa rastet e dhunimit janë në numër tepër shqetësues për qytetarët e Prishtinës dhe treguesit kryesorë për një gjendje jo të sigurtë për rrugët e Prishtinës, në vitin 2011 kanë ndodhur 5 raste të dhunimit, ndërsa në katër mujorin e parë të vitit 2012 ende nuk është shënuar asnjë rast i dhunimit, apo së paku nuk është lajmëruar ndonjë rast i tillë tek organet e sigurisë.

Shqetësimi kryesor është numri i madh e rasteve të aksidenteve të ndryshme të shënuara vetëm në këtë pjesë të katër mujorit të parë të vitit 2012, pasi që në qoftë se vazhdohet me këtë trend atëherë mund të arrijmë në përfundim se situata e sigurisë është shqetësuese. Nëse vazhdohet me veprime të tilla të krimit vjedhjeve, përdorimit të dhunës dhe dukurive negative, atëherë përqindja e rritjes së kriminalitetit do të rritet dhe jeta në kryeqytet do të behët më e rrezikuar.

Po ashtu INPO del edhe më këto rekomandime:
1. Policia të shtoj patrullimin
2. Të këtë patrulla të policisë me rroba civile
3. Të gjitha lagjet e qytetit të kanë ndriçim, sidomos lagjet ku raportohet për raste më të shpeshta
4. Bashkëpunimi dhe ndarja e informacioneve mes komunës së Prishtinës dhe policisë
5. Vendosjen e kamerave te sigurisë ne zonat më të rrezikshme të qytetit
6. Ngritjen e bashkëpunimit me qytetarë nga institucionet relevante
7. Të shqyrtohet mundësia e ndërtimit të stacioneve shtesë të policisë.