Ngritja e kapaciteteve te Policia e Kosovës në luftimin e krimeve ekonomike dhe korrupsionit”

23/09/2011

Ferizaj, 23 shtator 2011- Iniciativa për Progres, INPO në bashkëpunim me Forumin për Iniciativa Qytetare FIQ, ka realizuar tryezën me temë “Ngritja e kapaciteteve te Policia e Kosovës në luftimin e krimeve ekonomike dhe korrupsionit”, në kuadër të projektit “Rritja e mbikëqyrjes publike në sundimin e ligjit” i cili mbështetet nga fondacioni National Endoëment for Democracy.

Në këtë tryezë ishin të ftuar bartës të institucioneve të luftimit të krimeve ekonomike dhe korrupsionit, si dhe përfaqësues të partive politike të qytetit të Ferizajt, mirëpo të pranishëm ishin vetëm Kryetari i Gjykatës Komunale në Ferizaj, u.d. i Kryeprokurorit Komunal dhe përfaqësues nga njësiti i hetimeve të krimeve ekonomike dhe korrupsionit në Policinë e Kosovës të rajonit të Ferizaj, përfaqësuesit e dy partive politike AAK-së dhe Vetëvendosjes, mediet dhe shoqëria civile.

Përfaqësuesi nga Njësiti i Policisë për krime ekonomike dhe korrupsion Selatin Shahini, prezantoi punën e bërë viteve të fundit dhe ngriti çështjen e mungesës së hetuesve, apo numrin shumë të vogël të hetuesve të këtij njësiti. Ai përmendi mungesën e mbështetjes edhe brenda PK-së, për këtë njësit të rëndësisë së veçantë, si dhe mungesën e trajnimeve profesionale të stafit të këtij njësiti. Ndër të tjera theksoi se duhet të ketë një strategji nacionale të luftimit të krimeve ekonomike dhe korrupsionit, si psh. nxjerrja e ligjeve plotësuese si ligjin për Anti-mafian. Shqetësues ishte fakti i paraqitur, se prej themelimit të këtij njësiti, 30 hetues kanë shkëputur marëdhënien e punës me PK-në përshkak të mbështetjes financiare mjaft të vogël.

Sipas Statistikave Policore për rajonin e Ferizajt në vitin 2010 janë ngritur 99 kallëzime penale, 19 persona janë arrestuar për krime ekonomike dhe korrupsion. Ndërsa në vitin 2011 janë bërë 101 kallëzime penale dhe janë arrestuar 12 persona për krime të së njëjtës natyrë.
Kryeprokurori Komunal i Ferizajt, z.Shukri Jashari falënderoi Policinë e Kosovës për punën e bërë në luftën kundër krimeve ekonomike dhe korrupsionit, duke ritheksuar faktin që edhe Prokuroria Komunale e Ferizajt ka mungesë të stafit të mjaftueshëm për trajtimin e lëndëve të këtij lloji. Z. Jashari theksoi se ndonëse stafi nuk është i mjaftueshëm lëndët procedohen brenda afateve ligjore të parapara, edhe pse ka raste të zvarritjeve të lëndëve.

Kryetari i gjykatës komunale z. Bashkim Hyseni, u fokusua në një prizëm tjetër të çështjes, duke ngritur idenë e luftimit të krimeve ekonomike dhe korrupsionit, me një logjikë më proaktive nga ana e institucioneve përkatëse, si formë të rëndësishme të luftimit të korrupsionit. Kjo u tha të bëhet duke u mbështetur edhe në raporte të organizatave dhe institucioneve, si p.sh. Auditorit të komunave. Kryetari gjithashtu ngriti edhe çështje ligjore të luftimit të këtyre dukurive, duke thënë se edhe vetë Kodi penal i Kosovës, parasheh dënime të lehta për kryesit e këtyre veprave, në krahasim me kodet penale të shteteve të rajonit.

Panelisti tjetër i këtij debati, z. Afrim Demiri, ngriti çështjen e shkëmbimit të informacioneve në mes të Prokurorisë, Gjykatës dhe Policisë, si dhe Policisë me Eulex-in. Kryeprokurori u përgjigj duke thënë se nuk ekziston një databazë e informatave të përbashkëta mes prokurorisë dhe Policisë, kësisoj edhe mungon shkëmbimi i informacionit në mes të Prokurorisë dhe Policisë. Por që shpresëdhënës mbetet fakti që Prokuroria ka marrë premtimin nga OSBE, se kjo databazë do të formohet shumë shpejtë dhe ky problem do të zgjidhet. Sa i përket shkëmbimit të informatave mes PK-së dhe EULEX-it, zyrtari nga njësiti i Policisë për luftimi e krimeve ekonomike, u tha se nuk është i mirë dhe se në rastet kur EULEX kryen hetime, ato i bëjnë në mënyrë të pavarur nga PK andaj edhe nuk ka shkëmbim të informacionit.

REKOMANDIMET:

1. Bërja e strategjisë nga niveli nacional për luftimin e krimeve ekonomike dhe korrupsionit
2. Ngritja e kapaciteteve profesionale në njësitet policore për luftimin e krimit ekonomik dhe korrupsion
3. Tu Krijohen kushtet standarde Policisë për luftimin e krimit
4. Ndejkja penale e rasteve korruptive dhe krimit ekonomik me vet iniciative (ex officio) nga Prokuroria
5. Përfshirja e medieve dhe qytetarëve në luftën kundër krimit dhe korrupsionit
6. Procedim më të shpejtë lëndëve të kësaj natyre nga organet e Drejtësisë