Mbledhja e Pestë e Kuvendit Komunal – Kaçanik
04/06/2013Raport nga Monitorimi KK Kaçanik
31.05.2013
Mbledhja e Pestë e Kuvendit Komunal – Kaçanik
Mbledhja e Pestë e mbajtur me datën 31.05.2013 duke filluar me një vonesë prej 30 minutash ku arsyetim ishte mos funksionimi i teletransmetimit. Edhe pse teletransmetimi nuk u rregullua kjo mbledhje filloi me propozimin e Kryesuesit,z.Xhelal Gashi me këtë rend dite:
1. Aprovimi i Procesverbalit nga mbledhja e kaluar e kuvendit të komunës,
2. Projekt-Statuti i Qendrës për Punës Sociale në Kaçanik,
3. Propozim Rregullorja për Barazi Gjinore,
4. Propozim Vendimi për Rishqyrtimin e Vendimit të kuvendit të komunës 01Nr. 05-16-883/2011, për ndalimin e organizimit të lojërave të fatit në territorin e komunës së Kaçaniku, dhe
5. Informatë e Komisionit për Krimet e Luftës, në vitet, 1998/1999, në komunën e Kaçanikut.
– Në këtë mbledhje ishin të gjithë Delegatet e Kuvendit Komunal, përfaqësuesit e OSCE, monitorues të Vetëvendosjes, KDI, mediet, dhe një qytetar i komunës së Kaçanikut.
Miratimi i rendit te ditës;
Kryesuesi e përshëndeti kryetarin e komunës, delegatët e kuvendit, përfaqësuesit e shoqërisë civile dhe të gjithë të pranishmitë.Duke paraqitur rendin e ditës para delegatëve të kuvendit dhe ashtu siç u paraqit edhe u aprovua rendi i ditës.
1. Miratimi i Procesverbalit:
Procesverbali kishte vërejtje teknike dhe me vota unanime votohet me ndryshimin e atyre gabimeve.
2. Projekt-Statuti i Qendrës për Punës Sociale në Kaçanik:
Kryesuesi z.Xhelal Gashi e mbështet dhe i përgëzon hartuesit të këtij Projekt-Statuti të QPS-së. Kryesuesi i jep fjalën përfaqësuesit të komisionit të cilët kanë punuar në këtë Statut, ai siguron që në këtë Projekt – Statut kanë punuar Jurist Profesionalist mirë po Daut Rudi nga LDK-ja kishte vërejtje të nenit 9.4 “ Në rast të nënshkrimit të kontratave, nga pika 9.3 QPS-ja paraqitet si subjekt i pavarur juridik, bazuar në Ligjin për Prokurim Publik dhe aktet nënligjore të cilat i nxjerr Ministria e Financave”.
Z.Daut Rudi thotë se QPA-ja nuk ka mundur të jetë Person Juridik pasi që Komuna e ka këtë kompetencë. QPS-ja nuk mund të blej as të shes pasuri sepse ato janë prona të komunës dhe komuna merr vendim dhe thotë se ky nen bie ndesh me nenin 3.1 që thotë QPS-ja, ka në dispozicion mjetet dhe pasuritë të cilat i përkasin Komunës.Ndër të tjera z.Rudi thotë që ne në parim do ta votojmë këtë projekt- statut mirëpo nuk është mirë të lihen hapësirë për keqinterpretim. Kryesuesi i kërkon juristëve dhe komisionit hartues që t’a shikojnë edhe njëherë Statutin. Kuvendi e miraton më shumicë votash këtë Projekt – Statut.
3. Propozim Rregullorja për Barazi Gjinore,
Kryesuesi e informoi kuvendin që hartuesit të këtij propozim rregullore i kanë bërë ndryshimet të cilat i kemi kërkuar në mbledhjen e kaluar dhe ua dha fjalën asambleistëve që të japin mendimin e tyre lidhje me këtë Propozim Rregullore për Barazi Gjinore. Të gjithë anëtarët e kuvendit e aprovuan këtë Propozim Rregullore për Barazi Gjinore.
4. Propozim Vendimi për Rishqyrtimin e Vendimit të kuvendit të komunës 01Nr. 05-16-883/2011, për ndalimin e organizimit të lojërave të fatit në territorin e komunës së Kaçaniku,
Kryesuesi e hap diskutimin për këtë pikë të rendit të ditës dhe fjalën e merr z.Kemail Murseli. Z.Murseli e bënë të ditur se vendimi është marr para dy viteve edhe pse bie ndesh ky vendim me ligjin për lojërat e fatit miratimi i atij vendimi ka qenë vendim i mirë, mirpo me kalimin e Drejtorisë së Inspektoratit në përgjegjësinë e Ministrisë ne e kemi të pa mundur implementimin e atij vendimi. Z. Murseli gjithashtu cek se lokalet që merren me këtë veprimtari nuk i plotësojnë kushtet të cilat janë të parapara më ligjin e lojërave të fatit.
Ndërsa z.Zekria Loku ishte kundër shfuqizimit të këtij vendimi, ai e arsyetonte vendimin për ndalimi i lojërave të fatit bëhet me qëllim të parandalimit të problemeve të natyrave të ndryshme e të cilat janë pasojë e funksionimit të këtyre lokaleve ku organizohen këto lloj lojërash fati. Z.Loku, thotë se këto lojëra po ndikojnë edhe në nxitjen e kriminalitetit, prishjen e rendit e qetësisë publike dhe rrezikon mirëqenien sociale dhe në asnjë mënyrë nuk do të voton për shfuqizim të këti vendimi.
Kryetari i Komunës, z. Besim Ilazi është shprehur para anëtarëve të Kuvendit se Komuna nuk ka fuqi ekzekutive për ta zbatuar këtë vendimin prandaj edhe i ka propozuar Kuvendit për shfuqizim pasi që Inspektorati ka kaluar në përgjegjësi të Ministrisë dhe se nuk është mirë për Komunën të mbaj vendimi që nuk mund t’i zbatoj.
Edhe kryesuesi i Kuvendit, z. Xhelal Gashi e ka mbështetur kryetarin Ilazi. Ai ka thënë se më mirë është që të shfuqizohet ky vendim pasi nuk mundë të ekzekutohet. Përkrahë propozimit të kryetarit Ilazi janë pozicionuar edhe anëtarë të opozitës. Me 12 vota për, 10 abstenime dhe 2 kundër shfuqizohet vendimi për ndalimin e organizimit të lojërave të fatit në territorin e komunës së Kaçaniku
5. Informatë e Komisionit për Krimet e Luftës, në vitet, 1998/1999, në komunën e Kaçanikut.
Në bazë të Propozim-vendimit të Kryetarit të Komunës Xhabir Zharkut , 01Nr.16-2355/2011, Kuvendi i Komunës – Kaçanik në mbledhjen e mbajtur me datën 30.03.2011 morri Vendim për formimin e Komisionit për grumbullimin e materialit dhe ngritjen e padisë kundër Republikës së Serbisë për krimet e luftës.
Komisioni kishte për detyrë grumbullimin e dëshmive, materialit faktografik, deklaratave të ndryshme, klasifikimin dhe sistemimin e tyre si dhe përgatitjen për ushtrimin e padisë kundër shtetit serb dhe pjesëtarëve të forcave militare dhe paramilitare serbe lidhur me krimet e bëra ndajë njerëzve, popullatës civile shqiptare si dhe krimet materiale – ekonomike gjatë viteve 1998/1999 , në territorin e Komunës së Kaçanikut . Kryesuesi ftoj të gjithë qytetaret e komunës së Kaçanikut që kanë materiale dhe fakte shtesë lidhur me Krimet e bëra nga ana e forcave militare serbe ti dërgojnë në zyrë të Arkivit në Komunë.
Mbledhja mbaroi në ora 12:50