Ligji mbi Vetëqeverisjen Lokale ndanë legjislativin nga ekzekutivi

19/07/2008

19 Korrik 2008 – Në organizim të Iniciativës për Progres u mbajt debat me temën “Ligji për Vetëqeverisjen Lokale, detyrat, përgjegjësitë dhe sfidat në implementim”. Fokus i këtij debati ishte raporti në mes të Kryetarit të komunës si bartës i pushtetit ekzekutiv dhe Kuvendit Komunal si bartës i legjislativit. Pjesëmarrës të debatit ishin nënkryetari i komunës përfaqësues të grupeve parlamentare të përfaqësuara në Kuvendin Komunal, pjesëtar të shoqërisë civile. Nënkryetari i Komunës z. Besim Zymberi zgjedhja e të cilit shënon hapin e parë të Komunës së Ferizajt në zbatueshmërinë e ligjit, tha se “Ligji mbi vetëqeverisjen lokale përcakton më qartë hierarkinë e përgjegjësive dhe ngritë cilësinë e marrëdhënieve mes legjislativit dhe ekzekutivit, por ligji do të duhej t’i jepte më shumë kompetenca ekzekutivit në pjesën buxhetore. Kuvendi Komunal të miratonte buxhetin vetëm në vija të trasha për drejtori, në mënyrë që Kryetari i komunës të kishte mundësi për realizimin më të mirë të programit të tij. Duke e konsideruar si shumë të rëndësishme punën e komiteteve të Kuvendit Komunal, z. Fadil Halili shef i Grupit parlamentar të LDD-së tha se “Komitetet që do të formohen me ligjin e ri duhet të jenë funksionale, sikurse duhet të intensifikohen përpjekjet për implementimin e ligjit dhe akteve të tjera ligjore e nënligjore”. Pozita e Kryesuesit të kuvendit i ndihmon funksionalizimit të legjislativit komunal por mungesa e një zëvendëskryesuesi mund të sjellë probleme të mëdha në mos mbajtjen e mbledhjeve të Kuvendit Komunal në rast të mungesave të Kryesuesit”, tha Bashkim Fazliu shef i grupit parlamentar të PDK-së.

Debatuesit u shprehën të pakënaqur me mënyrën e informimit të vonuar dhe jo të drejtë me ligjin duke e fajësuar Ministrinë e Pushtetit Lokal edhe për konsultat jo të mjaftueshme dhe korrekte me strukturat lokale për bërjen e Ligjit për Vetëqeverisjen Lokale. Ky ligj rregullon shumë aspekte të funksionimit të pushtetit lokal por ka ende vërejtje të cilat do të duheshin të përmirësoheshin që së paku mandati i ardhshëm të filloj në mënyrë të sa më të mirë dhe që komunat të mos merren më me përshtatjen e statuteve dhe rregulloreve me ligjin. Ligji i ri ka sjellë disa nevoja për ndryshime si të statutit të komunës i cili është tërhequr nga diskutimi publik pas ndryshimeve të bëra për shkak të hyrjes në fuqi të rregullores 2007/30 mbi qeverisjen e komunave. Ndryshimet në legjislacion sa kanë qenë pozitive aq edhe kanë sjellë probleme në funksionimin e Komunës. Pjesëmarrësit e debatit theksuan nevojën e rritjes së rolit të Kuvendit Komunal duke e vlerësuar se Ligji mbi Vetëqeverisjen Lokale jep një adresë më të saktë të përgjegjësisë në zhvillimin e Komunës që është pozita e Kryetarit ndryshe nga më parë kur kishte një ngatërrim të përgjegjësive në mes të Kryetarit të Komunës, Kuvendit Komunal dhe Kryeshefit të Ekzekutivit.