“Kryetari është nën detyrë ligjore të shpërndaj informacionin, të bashkëpunoj dhe të takohet me OJQ”

18/11/2011

Ferizaj, 18 nëntor 2011- Me 12 tetor 2011, nën organizmin e kryetarit të Komunës është mbajtur mbledhja KKSB-së, për të cilën INPO nuk ka qenë në dijeni dhe nuk është ftuar fare.

INPO me 14 tetor 2011, i ka dërguar kryetarit të Komunës notë proteste për mos-ftesën për mbledhjen e fundit të KKSB-së . Përmes kësaj letre ne kemi kërkuar sqarime se pse INPO nuk është ftuar në këtë mbledhje, duke i bërë të ditur se ne jemi anëtarë të këtij këshilli dhe kemi të drejta dhe obligime të barabarta me anëtarët e tjerë.

Përgjigjja zyrtare e Kryetarit të Komunës Bajrush Xhemaili ka qenë “ Ju njoftoj se nuk i përgjigjem INPO-së”.

Ne i rikujtojmë kryetarit Xhemaili se ai nuk ka të drejtë dhe kompetence për përjashtimin e INPO-së nga KKSB-ja, dhe ka bërë shkelje të udhëzimit administrativ Nr.08/2009 MPB-01/2009 MAPL për këshillat komunale për siguri në bashkësi, neni 9 pika 1 ku thotë : Anëtarët e KKSB-së me shumicë votash përjashtojnë ndonjë anëtarë nga KKSB-ja në rast se ai/ajo dështon në përmbushjen e detyrave të veta, të parapara me ligjet e zbatueshme.

Ne nuk jemi në dijeni se anëtarët e KKSB-së e kanë përjashtuar INPO-n nga ky këshill dhe ky veprim i kryetarit, përveç që është kundër rregullave të funksionimit të KKSB-së, me ç’rast i mohohet pjesëmarrja një anëtari të këtij institucioni, po ashtu është edhe kundër parimeve të qeverisjes demokratike, të cilat ai është zotuar se do t’i mbroj, gjatë kohës sa kërkonte votën e qytetarëve për të arritur aty ku është.

Kjo nuk është hera e parë që kryetari Xhemaili injoron kërkesat e INPO-së, duke bërë shkelje të ligjit për qasje në dokumente zyrtare, ligjit për transparencë e udhëzimeve administrative të tjera.

Organizata INPO qysh prej mandatit të parë të Kryetarit Xhemaili, kishte pasur raporte konstruktive me këtë të fundit duke dhënë kontribut të çmuar për forcimin e demokracisë dhe parimeve të transparencës në punën e komunës së Ferizajt dhe përfaqësimin e interesave të qytetarëve të Ferizajt. Ndërsa tani kryetari nuk e njeh më INPO-n.

Kryetari Xhemaili duhet të krijoj hapësirën për bashkëpunim reciprok dhe konstruktiv me të gjithë përfaqësuesit e shoqërisë civile në Ferizaj dhe të mos zbatoj praktika selektive, sikurse kanë bërë kryetarët paraprak.