Komunikatë për Media

05/08/2011

05 gusht 2011, Ferizaj – Zyrtarë të INPO-s sot para se të filloj seanca e tetë e rregullt e KK Ferizaj, ju ka shprëndarë këshilltarëve të Kuvendit kërkesën për anulim të pikës së 7 të rendit të ditës “Propozim-Vendim për kufizimin e ofrimit të shërbimeve të caktuara komunale dhe kushtëzimin e ofrimit të këtyre shërbimeve me pagimin e faturave për mbeturina dhe ujë”. Në këtë kërkesë kemi potencuar se një propozim-vendim i tillë është jo ligjor dhe kundër praktikave të administratës efikase. Lidhur me rastet e mos-pagesës së faturave të shërbimeve komunale të ujit, mbeturinave apo edhe shërbimeve tjera sikurse është energjia elektrike, ngrohja, është paraparë në mënyrë të qartë se cilat procedurat ligjore duhet ndiqen për të detyruar qytetarët t’i paguajnë ato. Sipas Ligjit për Procedurën Përmbarimore (Ligji nr. 03-L08), neni 30, faturat e shërbimeve komunale kanë titull ekzekutiv dhe përmbarimi për to bëhet në procedurë gjyqësore drejtpërdrejt.

Ne e përshëndesim mbështetjen dhe qëndrimin e opozitës në kuvend për anulim të kësaj pike të rendit të ditës, e cila me gjithë insistimin e partive opozitare u miratua me dy vota diferencë.
Këshilltarët të cilët votuan pro këtij propozim-vendimi ishin edhe Ylber Topalli, Asllan Shabani dhe Feride Nebihu e të cilët janë edhe anëtarë të bordit të drejtorëve të ndërmarrjeve publike rajonale KRM “Pastërtia” Sh. A dhe KRU “Bifurkacioni” SH. A.

Ligji Nr. 03/L-087 për ndërmarrjet publike neni 17.2 pika k, thotë se një person nuk konsiderohet i pavarur dhe nuk kualifikohet për zgjedhje si drejtor në një ndërmarrje publike nëse është zyrtarë i zgjedhur publik, i emëruar politik ose bartës i një posti udhëheqës ose vendim marrës në një parti politike.

Këshilltarët e cituar me lartë janë zyrtarë të zgjedhur publik dhe ushtrojnë poste publike (këshilltarë komunale) si dhe Ylber Topalli përveç se është këshilltarë është edhe kryetarë i degës së partisë demokratike në Ferizaj.

INPO konsideron se këta tre këshilltarë nuk duhet të jeni pjesë e bordeve të drejtorëve të këtyre ndërmarrjeve publike e aq më tepër të votojnë pro një vendim-propozimi të tillë për shkak të konfliktit të interesit.

Edhe pse ky propozim-vendim është shtyrë për miratim në një seance tjetër, INPO do të vazhdoj të avokoj tek partitë politike që mos ta miratojnë këtë vendim që bie në kundërshtim më shumë aspekte ligjore dhe praktike. Në qoftë së ky miratohet INPO do t’iu drejtohet instancave qendrore lidhur më këtë çështje.