INPO kërkon mbajtjen e një seance dëgjimore për MAPL-në
23/05/2013Dje me datë 23 Maj 2013 organizata Iniciativa për Progres ka dorëzuar një kërkesë për Komisionin Parlamentar për Arsim, Kulturë, Rini, Administratë Publike, Qeversije Lokale dhe Media për inicimin e një seance dëgjimore mbikqyrëse për Ministrinë e Administrimit të Pushtetit Lokal (MAPL). Përmes kësaj kërkese kemi paraqitur neglizhimin e MAPL-së ndaj disa kërkesave dhe reagimeve të bëra nga INPO për shkeljen e ligjeve në fuqi nga ana e pushtetit lokal dhe kemi kërkuar nga kryetari i komisionit z.Idriz Vehapi që të ftojë në një seancë dëgjimore z.Slobodan Petrovic dhe të kërkojë përgjegjësi për veprimet e pushtetit lokal në kundërshtim me dispozitat ligjore për qeverisjen lokale, të cilat kanë kaluar pa u vërejtur nga Ministria që ai drejton.
Sipas nenit 76 të ligjit për Vetëqeverisjen Lokale, Ministria e Administrimit të Pushtetit Lokal është autoriteti mbikëqyrës i komunave dhe në fokus të monitorimit të kësaj Ministrie është mbikëqyrja e kushtetutshmërisë dhe ligjshmërisë së punës së pushtetit lokal. Mirëpo, përgjigjiet e MAPL-së ndaj reagimeve të INPO-së, në radhë të parë lidhur me konfirmimin e mandatit të drejtorëve komunal pas zgjedhjeve të jashtëzakonshme nga kryetari i komunës së Ferizajt, kanë qenë të natyrës përshkruese dhe kanë lejuar që të vazhdohet qeverisja nën presion politik dhe me shkelje të nenit 67.2 të Statutit të komunës së Ferizajt, që thekson se ‘’çdo drejtori menaxhohet nga drejtori, i cili emërohet nga kryetari për të njëjtin mandat dhe shkarkohet nga kryetari’’.
Problem tjeter i ngritur nga INPO kanë qenë edhe emërimet në Këshillin Komunal për Siguri në Bashkësi (KKSB), nga kryetari i komunës së Ferizajt në kundërshtim me Udhëzimin Administrativ Nr.27/2012 MPB-03/2012 të nxjerr nga MAPL-ja. Me hyrjen në fuqi të këtij Udhëzimi komunat u obliguan që ta ndryshojnë përbërjen e vjetër të KKSB-së, sipas Nenit 9 të këtij Udhëzimi kryetari i komunës së Ferizajt, si Kryesues i KKSB-së ka qenë i obliguar që brenda tridhjetë (30) ditëve nga hyrja në fuqi e këtij Udhëzimi Administrativ, përmes mediave publike, të ftoj komunitetet përkatëse për të bërë propozimet e anëtarëve të tyre për KKSB. Në vazhdim të këtij neni thuhet se në bazë të propozimeve të komuniteteve përkatëse, Kryesuesi përgatit listën e anëtarëve të KKSB-së duke përfshirë të gjithë akterët, ashtu siç është përcaktuar në nenin 4 të këtij udhëzimi administrativ dhe të njëjtën listë e dërgon në Kuvendin Komunal për miratim, që kryetari nuk i ka respektuar.
Edhe për këtë vendim jo të ligjshëm të kryetarit të komunës së Ferizajt MAPL-ja nuk ka ndërmarrë asgjë dhe ka lejuar që OJQ-ve t’iu mohohet e drejta që të zgjedhin përfaqësuesin e tyre në KKSB.
Gjithashtu në këtë kërkes INPO ka paraqitur edhe një problem mjaftë shqetësues për mos raportimin tremujor të kryetarëve të Komunave në Kuvendin Komunal, ashtu siq parashihet me Ligjin për Menaxhimin e Financave Publike(Ligji NR.03/L-048) që në nenin 45 pika 4 e obligon kryetarin e komunës që të përgaditë dhe t’i dorëzoj Kuvendit Komunal raporte tremujore të cilat e mbulojn vitin fiskal deri në fund të tremujorit i cili sapo ka përfunduar. Edhe në këtë rast MAPL nuk i ka ushtruar kompetencat e saj në raport me kryetarët e komunave që nuk po i respektojnë dispozitat e këtij ligji dhe nuk po raportojnë në Kuvend.
Në fund të kësaj kërkese INPO ka paraqitur edhe mungesën e Bashkëpunimeve Ndërkomunale që tregon se MAPL nuk ka qenë e aftë që të përmbush misionin dhe obligimet e saja institucionale që të shëndrrohet në mekanizëm promovues dhe të shtyjë përpara krijimin e Bashkpunimeve Ndërkomunale si një ndër mënyrat më efikase për rritjen e cilësisë së shërbimeve publike.
Prandaj përmes kësaj komunikate, edhe një herë i bëjmë thirrje kryetarit të komisionit z. Idriz Vehapi që të inicioi një seancë dëgjimore dhe të kërkoj përgjegjesi për aktivitetin e MAPL-së me fokus në reagimet e bëra nga INPO për shkeljen e ligjeve nga komunat e Kosovës.