INPO e shqetësuar për gjendjen e sigurisë në shkollat e Kosovës

24/05/2011

Organizata INPO shpreh shqetësim për gjendjen e sigurisë në shkollat publike në Kosovë. Dhuna nëpër shkolla, si në të kaluarën por edhe sot po dëshmohet se është një problem shumë serioz, i cili duhet të gëzojë vëmendjen dhe trajtimin adekuat nga të gjitha institucionet relevante si dhe faktorët tjerë, të kyçur në procesin edukativo arsimor në Kosovë.

Organizata INPO shpreh keqardhje për vrasjen e nxënësit në Gjimnazin “Sami Frashëri”. Ky rast sikurse edhe raste tjera në të kaluarën, janë dëshmi mbi pasigurinë e nxënësve në objektet shkollore dhe ambientet përreth tyre. Mbi të gjitha janë tregues të dështimit të institucioneve arsimore, institucioneve të sigurisë për të adresuar këtë problem serioz që ka filluar të marrë përmasa shqetësuese në shkollat e Kosovës.

Është për të ardhur keq që në vend të ambienteve të dijes dhe shkencës, shkollat po shndërrohen në hapësira të dhunës dhe kacafytjesh, të cilat po përfundojnë edhe me fatalitet për nxënësit. Sipas të dhënave të Policisë por edhe sipas raportimeve më media, rastet e dhunës ndërmjet nxënësve janë vazhdimisht në rritje.

Bashkëpunimi dhe komunikimi cilësor dhe i vazhdueshëm ndërmjet institucioneve arsimore, të sigurisë, prindëve dhe vetë nxënësve, është hapi i parë për të adresuar problemin e dhunës në shkollat e Kosovës.

Institucionet shtetërore duhet të angazhohen më shumë për të identifikuar shkaqet dhe gjetur zgjidhjet konkrete që do të ndikonin në zvogëlimin, eventualisht, zhdukjen e plotë të dhunës nëpër shkolla dhe ambientet përreth tyre.