Deklaratë për Media:INPO publikon raportin e monitorimit “Qeverisja Lokale në Ferizaj,Janar-Dhjetor

03/03/2012

Ferizaj, 7 mars 2012- Iniciativa për Progres (INPO) publikon raportin “Qeverisja Lokale në Ferizaj” bazuar në monitorimin e komunës gjatë periudhës Janar-Dhjetor 2011. Monitorimi është fokusuar në Asamblenë Komunale dhe Ekzekutivin e Komunës.
Metodologjia e përdorur në hartimin e këtij projekti përfshin elemente të hulumtimit cilësor, sasior dhe krahasues dhe adreson progresin e organeve komunale lidhur me premtimet dhe pritjet e qytetarëve, parimet e qeverisjes së mirë dhe transparente dhe adresimin e problemeve me të cilat përballet komuna.
Nga të gjeturat e monitorimit INPO vlerëson se qeverisja në Komunën e Ferizajt ka shumë probleme, përkundër disa të arriturave në fusha të caktuara. Nga rrethi i përgjegjësive të cilën e ka, komuna e Ferizajt nuk është duke treguar rezultate apo të shënoj ndonjë progres në atë nivel sa të ndryshojë në mënyrë të dukshme gjendjen jo të mirë në qytetin e Ferizajt.

Transparenca dhe llogaridhënia

Në kuadër të Transparencës Komuna e Ferizajt mbetet pjesërisht e mbyllur për bashkëpunim më qytetarë dhe OJQ-të. Ky është një përfundim nga monitoruesit e organizatës INPO por që është evidentuar edhe nga raportimet e medieve të shkruara dhe atyre vizuale lokale. Ka pasur disa raste përmes të cilave komuna ka dëshmuar mos respektimin e transparencës dhe qeverisjes se mirë, duke përfshirë mbylljen e kryetarit ndaj organizatës INPO, neglizhimin e kërkesave për qasje në dokumente publike të bëra nga INPO, mungesën e informimit mbi mos qëndrueshmërinë e investimeve, etj. Një prej dobësive të komunës së Ferizajt është edhe përfshirja e qytetareve në vendimmarrje dhe pjesëmarrja e tyre në Konsultimet Publike. Takimet me qytetarë behën vetëm sa për të përmbushur obligimin ligjor, i cili buron nga Ligji për Vetëqeverisje Lokale.
Pengesa serioze nga ana e kryetarit ka edhe sa i përket llogaridhënies, kjo ne raport me Kuvendin e Komunës. Mbledhjet e Kuvendit nuk kanë pasur peshë të madhe për kryetarin Xhemaili, ku gjatë tërë vitit 2011 vetëm dy herë ka marrë pjesë në punimet e Kuvendit dhe atë vetëm kur behët prezantimi i raportit të punës dhe atij financiar. Gjithashtu kërkesat dhe pyetjet e këshilltareve nuk marrin përgjigje nga na e tij
Bashkëpunimi me shoqërinë civile ketë vit nuk ka qenë një nga prioritetet për kryetarin. Ai vazhdon të jetë i mbyllur ndaj organizatës INPO, si një ndër organizatat më aktive të shoqërisë civile në Ferizaj dhe vazhdon të këtë qasje selektive ndaj organizatave. Qasja e tillë mos bashkëpunuese me INPO-n sipas kryetarit qëndron në arsyetimin se INPO e ka shpallur persona non-grata në publikimin e biografive të personave publik e të cilët kishin probleme me ligjin duke e quajtur organizatën si të njëanshme dhe të ndikuar. Pa marrë parasysh cili është mendimi i kryetarit për INPO-në, ai është nën detyrë ligjore të bashkëpunoj me OJQ-të e interesuara për punën e komunës. Gjithashtu kryetari Xhemaili ka përjashtuar INPO-në nga Këshilli Komunal për Siguri në Bashkësi, duke mos e ftuar në punimet e këtij këshilli.

Ekzekutivi i Komunës

Ekzekutivi në nivelin komunal paraqet pushtet mjaft të fuqishëm me kompetenca të mëdha dhe i cili udhëhiqet nga Kryetari i Komunës. Gjatë vitit 2011 komuna nuk ka arritur të krijoj zhvillim ekonomik, të ulë nivelin e papunësisë dhe ofroj mirëqenie për qytetarë.
Buxheti i komunës për vitin 2011 ka qenë 16.741.547. Notë e mirë i jepet rritjes së vlerës buxhetore në kategorinë e investimeve kapitale për 6.4 % krahasuar me vitin 2010. Mirëpo kjo rritje nuk ka gjeneruar zhvillim ekonomik dhe investimi i tyre nuk është i qëndrueshëm. Subvencionet kanë pasur një rritje prej 3. 14%, ku nga kjo kategori është bërë ndarja e bursave për student. Edhe të hyrat vetanake nga vitit 2011 kanë shënuar rritje apo tejkalim të planit të inkasimit të të hyrave vetanake për 21.4%, mirëpo kjo nuk pasqyron efikasitet dhe sukses pasi taksat e vjelura nga komuna përfshinë borxhet e taksapaguesve nga vitet paraprake të cilat komuna nuk ka arrit ti inkasoj me kohë.
Sa i përket cilësisë së shërbimeve publike, efikasitetit dhe profesionalizmit të stafit Komuna e Ferizajt ka probleme të mëdha. Përgatitja profesionale e stafit të angazhuar në komunën e Ferizajt është jo e kënaqshme, ku 54.7% e stafit të Komunës është me shkollë të mesme dhe pozitat të cilat ata bartin kërkojnë kualifikime profesionale adekuate. Nga 283 të punësuar, me shkollim superior janë 103 ose 36.3%, shkollim të lartë 22 ose 7.7% dhe me shkollim fillor 15 ose 5.3%. Problem tjetër me stafin e Komunës së Ferizajt është edhe ripërtëritja e stafit të komunës, i cili është shumë i ultë dhe nuk ka raste të shpeshta. Kriteret e konkurseve publike ju përshtaten njerëzve të cilët përcaktohen më parë për të qenë në ato pozita dhe punësimet kryesisht bëhen në baza partiake dhe nepotizmit. Kjo si shkas i disa konkurseve të cilat i ka shpallur komuna për pozita publike, si ai i zyrtarit për njësinë e informimit ku kualifikimet profesionale të kërkuara për këtë pozitë ishin shkollë e mesme me drejtim të shkencave natyrore. Ky proces ka qenë i montuar paraprakisht dhe forma e si është rregulluar konkursi nuk përkon me pozitën për të cilën është shpallur.
Sa i përket arsimit problemet fillojnë nga infrastruktura e deri të cilësia e tij. Nga vlera buxhetore prej 7,279.977 euro, kategoria e investimeve kapitale ka përfituar shumën prej 923.153 euro ku janë realizuar 18 projekte nga 20 të parapara, që përfshihet ndërtimi i 3 anekseve të shkollave dhe meremetimi i 15 të tjerave . Cilësia e arsimit të mesëm është jo e kënaqshme. Përveç nxënësve të cilët nuk marrin nota kaluese, vlerësim të tillë sipas inspektorëve marrin edhe shumë profesorë të tyre. Suksesin e nxënësve të komunës së Ferizajt e tregon edhe testi kombëtar i maturës shtetërore ku vetëm 34.06% e maturantëve kanë arritur rezultate pozitive. Siguria në shkolla mbetet çështje delikate në komunën e Ferizajt, ku gjatë vitit 2011 në stacionin Policor të Ferizajt janë lajmëruar 37 raste të incidenteve në objektet shkollore.

Kuvendi i Komunës

Kuvendi i komunës është organi më i lartë përfaqësues i pushtetit lokal. Mirëpo punimet e Kuvendit gjatë periudhës raportuese janar-dhjetor 2011 nuk kanë pasur ndonjë ndikim të dukshëm në përmirësimin e jetës së qytetarëve. Shqetësuese është niveli i ulët i debatit dhe diskutimeve në asamble. Mos përgatitja adekuate e asambleistëve para seancave ka kthyer në rutinë që kryesisht fjalën ta marrin vetëm shefat e grupeve parlamentare. Rendet e ditës në mbledhjet e kuvendit kanë qenë kryesisht shpallje e interesit të përgjithshëm të ngastrave kadastrale, ndryshim destinimi i ngastrave dhe dhënia në shfrytëzime pronës Komunale dhe agjendat ndërtohen kryesisht në bazë të interesit partiak. Kuvendi ka dështuar të instaloj mekanizma kontrollues ndaj aktiviteteve të komunës dhe shpenzimeve të cilat behën. Shqetësuese është edhe pjesëmarrja e femrave në diskutimet e kuvendit. Gjatë tërë vitit 2011 zëri i gruas në kuvend pothuaj së nuk është dëgjuar fare. Femrat njëjtë si edhe meshkujt janë legjitimuar me votën e qytetarit dhe mbajnë përgjegjësi për ti përfaqësuar interesat e tyre në kuvend.